Shillong, Naitung 20
U Coach ka Langsning Football Club, Bah Khlaiñ Pyrkhat Syiemlieh u la pynpaw ba ka jingpynkhreh na ka bynta ka samoi ïalehkai mynta ka snem ka long kaba la biang bha namar ka la pynkhlaiñ biang ïa ka kynhun.
Haba ïakren bad ki lad pathai hadien ka jingïalang pyllait paidbah ïa ki jersey ïalehkai jong kane ka klob na ka bynta ka lympung ïalehkai Shillong Premier League ban pynïaid da ka Shillong Sports Association (SSA), u Bah Khlaiñ u la ong ba kane ka rukom pynkhreh ka la long kaba khampher na u smem ba la lah.
Haba batai kham bniah halor kane ka jingpynkhlaiñ ka kynhun, u Bah Khlaiñ u la ïathuh ba ka klob ka la soi arngut ïa ki rangïalehkai kiba na shabar jong kane ka Jylla, katta uwei u dei na Delhi bad sa uwei pat na Assam, ïa kaba la bynrap lang ruh sa arngut ki rangïalehkai kiba dei napoh ka ri lum Garo, bad kiba sah pat ki dei ki samla ïalehkai na them Ri-Bhoi, Ri lum Jaiñtia bad kumjuh na Khasi Hills. “Haba kheiñ kyllum ki jingdon jong ki rangïalehkai ki don 26 ngut.”
Ha kaba ïadei bad ka jingïalang pyllait jersey paidbah, u Bah Khlaiñ u sngew ban ai khublei shibun ïa ki nongpynïaid jong ka klob kiba la shim ïa kane ka sien jam da kaba ai mynsiem shi katdei ïa ka kynhun hi baroh kawei. Kum ki rangïalehkai haba ki ki phong ïa kine ki jersey ïalehkai jong ka klob, ki dei ban pynrung artad ha ki ïa ka mynsiem ba ki sngew sarong bad ka jingburom,” la kyntu utei u coach ïa ki rangïalehkai hashwa ba kin mih madan ha ka Shillong Premier League.
