Shillong, Naitung 20
U Myntri Rangbahduh ka ri u Narendra Modi ha ka Sngi U Blei u la ong ba ka Meghalaya ka ïeng kum ka saiñdur na ka bynta ka India kaba lah ban ïaleh pyrshah bad kaba lah ban shaniah ha lade.
U Modi u la ïasam ïa ka jingthoh ba la thoh da ka Nirmala Sitharaman, Myntri ka tnat Pla Tyngka jong ka Sorkar Pdeng, kaba pynpaw ïa ka jingkylla ba phylla jong ka Meghalaya ba la pynlong da ka kam jngohkai pyrthei, ka jingpynkup bor ïa ki samla, ki Self-Help Group (SHG) ba ïalam da ki kynthei, bad ki jingsdang kum ka PM Suryaghar Muft Bijli Yojana, ka Vibrant Village Programme bad kiwei kiwei.
Haba jubab ïa ka jingthoh jong ka Myntri Pla Tyngka halor ka rynsan X, u Modi u la ong: “Ka Myntri Pla Tyngka jong ka Sorkar Pdeng ka Sitharaman ka la pynpaw ïa ki jingkylla ba kiew bha jong ka Meghalaya lyngba ki kam jngohkai pyrthei, ki SHG, ki jingsdang PM Suryaghar Muft Bijli Yojana, ka Vibrant Village Programme bad kiwei. Ryngkat ka jingkyrshan kaba khlaiñ na ka Sorkar bad ka imlang sahlang, ka jylla ka ïeng kum ka saiñdur na ka bynta ka India kaba lah ban ïeng bad kaba lah ban shaniah ha lade.”
Kham mynshwa, ha ka post jong ka halor ka rynsan X, ka Sitharaman ka la ong: “U Chief Secretary ka Jylla, u Donald Wahlang, u la ïathuh kumno ha u snem 2005 u la hap ban jngi lyngba ka wah ban poi sha ka shnong Nongjri. Mynta, ïa ka jingkieng la lah ban pyndep ha u snem 2021, kaba pyni ïa ka jingtrei shitom jong u Myntri Rangbahduh ka Ri kumno ban ïaleh pyrshah ïa ki jingeh kiba ïakynduh da ki nongshong shnong ha ki thaiñ khappud bad kyndong bha.
Ka la kdew shuh shuh ha ka jingthoh jong ka, kaba la pynmih ha kawei ka kot khubor phareng kaba ong: “Dang shen, ha ka jingleit jngoh jong nga ïa ka Meghalaya, nga la ïaid da ka surok na Guwahati sha Shillong. Ka surok ka long kaba heh, bad ki kali ki ïaid beit ïaid ryntih. Kane ka la long shisien ka lynti kaba rim, kaba kyllaiñ – kaba rit bad kaba jylliew bha – ha kaba ka lyer kaba pynmih lyer jakhlia.”
“Ka jingsangeh kaba nyngkong eh jong nga ka dei ha ki ‘backwaters’ jong ka pung Umïam kaba itynnad bha ha Ri Bhoi district. Ïa ka wah Wah Umkhrah bad Wah Umshyrpi la khang dam ha ki snem 1960 ban pyndonkam ïa ka bor Hydel. Mynta kane ka pung ba la shna da u briew ka la kylla long ruh ka jaka pdeng jong ki jingïalehkai um bad ki kam jngohkai pyrthei,” ka la bynrap.
“Ka kam jngohkai pyrthei ka la thaw ïa ki lad kamai baroh shisnem na ka bynta kito kiba sah hajan ka pung, kaba long ka dak jong ka jingïatreilang jong ka Sorkar bad ki nongshong shnong sha ki jaka kiba don ka lad ban jngohkai pyrthei,” la pynkut ka Myntri Pla Tyngka.
