Tura, Naitung 20
Haba bteng ïa ka jingkhynra pyrshah ïa ki kam tuh ar shaka, ki pulit ka North Garo Hills ha ka Sngi U Blei ki la ïoh ban kurup sa ar tylli ki ‘Scooty’ ba shah tuh hadien ka jingïoh kem ïa uwei uba suba shah kynnoh ha kaba ïadei bad ka jingjia ha Damra, Assam.
Ki pulit ki la kem ïa uba shah kynnoh donkti, u Palsrang R. Marak (20 snem ka rta) uba la tip ruh kum u Chusrang na Tengasot, Damra hapoh Dudhnoi PS, Goalpara Assam haba ïadei bad ka mukotduma ha Resubelpara PS Case No 13/2025.
Ïa ki ‘Scooty’ ba shah tuh la ïoh kurup katkum ki jingtip ba la ïoh ksai na uba shah kem bad kynnoh donkti ha kane ka kam.
“Ïa une ba shah kynnoh donkti la phah sha ïingbishar na bynta ki kam ba ïadei bad ka aiñ. Ki pulit ka North Garo Hills ki ïai bteng ban pynneh-pynsah ïa ka suk ka saiñ bad ban pyntikna ïa ka hok lyngba ka jingtreikam kaba kloi bad kaba tbit,” ong ki pulit.
Lah ban pynkynmaw ba la ïoh kurup ruh ïa kawei ka ‘Scooty’ (ba la shah tuh kham ha shuwa) ha ka Sngi Palei kaba la ïalam sha ka jingshah kem jong uwei u briew ha katei ka por.
