Shillong, Naitung 20
Ha ka sien ba nyngkong eh da ka mynsiem jong ka jingthrang ban kyntiew ïa ka pule-puthi hapoh ka shnong ka thaw, ka Seng Samla Dangar (SSD) ka la pynlong da ka Academic Excellence Award 2025 ïa kiba la pass bha ha ka eksamin SSLC bad HSSLC kum shi bynta ban pynshlur ïa kiwei pat ki samla jong ka shnong.
Ïa kane ka jingpynkup burom ïa ki samla kiba pass bha la pynlong ha ka 19 tarik mynta u bnai Naitung ha Community Facility Centre, Dangar ha kaba u Bah Himalaya M Shangpliang kum nongaibuit ka Sorkar jong ka tnat pule-puthi u la long kum u kongsan bad pynkup burom ïa 8 ngut ki samla kiba la pass bha.
Nalor u Bah Shangpliang la wan ban ïadonlang ruh da u Rangbah Shnong u Bah HS Syiemlieh bad kiwei kiwei de ki ‘riew rangbah jong ka shnong bad kumjuh ruh jong ka dong ka thaiñ bad kumjuh ruh ki nonghikai skul jong ka shnong lem bad ki kmie ki kpa kiba la wan ban sakhi.
U Bah HM Shangpliang haba kren ha ka jingïalang, u la ai khublei ïa ka seng samla jong ka shnong kaba la shim ïa kane ka sienjam ban nang pynshlur bad ai mynsiem ïa ki samla pule lyngba kane ka Academic Excellence Award 2025.
U Bah Shangpliang u la pynpaw ruh ba ka Sorkar hapoh ka jingïalam jong ka National People’s Party mynta u snem 2025 ka la wanrah ïa ka jingkylla ha ka tnat pule puthi bad bynrap ruh ba mynta u snem ki khun samla ki la pass bha bad u la ai khublei ruh ïa ki nonghikai skul kiba la ïa trei shitom.
Haba kren halor ka jingkordor jong ka jingnang jingstad, u Bah Shangpliang u la ong ba ki kmie ki kpa ki donkam ban ïa don bynta ha la ki ïing ki sem ban peit ïa ki khun ki kti ba kin trei shitom bad kumjuh ruh ki nonghikai skul kiba long kum ki kmie ki kpa ba-ar.
“Ha thaiñ border (khappud) ki don shibun ki kmie ki kpa kim nang kim stad ïa lade hynrei ki sngewthuh ïa ka jingkordor ka pule puthi, kumta ki trei shitom tang ban ïoh pynnang pynstad ïa la ki khun ki kti,” u la ong.
Haba kren ha ka jingïalang u Bah HS Syiemlieh u la pynpaw ba u dap da ka jingkmen ïa kane ka sienjam ba la shim da ka seng samla ban pynlong ïa kum kane ka prokram ha ka sien ba nyngkong eh bad kane ka jingleh ka seng samla kala leh ïa kaba bha ban ai mynsiem ïa ki samla pule jong ka shnong ka thaw.
Shuh shuh u Bah Syiemlieh u la ong, ki khun samla jong ka shnong Dangar kiba la leh bha ha ka eksamin SSLC bad HSSLC ki dei hok ban ïoh ïa kane ka khusnam bad bynrap ruh ba ha kane ka juk ba mynta kiba bun ki briew kim ju kylli shuh phi pass ne em hynrei ki kylli katno percentage phi ïoh, te donkam ïa ki kmie ki kpa ban ïatreilang bad ki khun ban trei shitom.
U Bah Syiemlieh u la pynpaw ruh ba kiba bun ki kmie ki kpa ki dei kiba duk bad kiba don ha ka ïoh ka kot kaba duna hynrei ki angnud bad thrang bha ban pynnang pynstad ïa la ki jong ki khun ki kti da kaba ki leit bylla thohdieng tang ban ïoh phah skul ïa ki khun.
Ha kane ka sngi la ïoh ruh ka jingkren na u Bah T Kharraswai uba dei u nonghikai ha kaba u la ai ka jingsneng jingkraw ïa ki khynnah skul bad kren ruh halor ki dak thoh Khasi bad pynpaw ruh ka jingkyrmen ba ka ktien Khasi kan ïoh rung noh ha ka khyrnit ba phra jong ka riti synshar ka ri India.
