Shillong, Naitung 20
U Bah P.T Sawkmie, MLA barim u la kyrpad ïa u Myntri Rangbah ka Jylla u Conrad K Sangma bad ïa u Symbud Myntri Rangbah Bah Sniawbhalang Dhar uba khmih ruh ïa ka tnat Transport ban phaikhmat lem sha ki samla kamai arshaka ne Rapido, khnang ba kine ki samla kin ïeng ha la ki jong ki kjat ban kamai kajih.
“Ngi hap ban ai jingïaroh ïa kine ki samla namar dalade ki trei shitom miet la bad sngi bad ka dei ka bynta jong ka Sorkar ban ïarap lem ïa ki, khnang ba ka kamai ka jong ki kan biang,” ong u Bah Sawkmie.
U la bynrap, “Kumba na ka liang u Myntri Rangbah u la plie ki lad ki lynti ïa ki samla ka jylla ha kiba bun ki liang, kaba la long ka jingmyntoi kaba khraw ïa ki samla, kumjuh ruh ka jingshimkhia ka Sorkar ïa ki samla kamai Rapido kan long shuh shuh ka jingïarap kaba khraw ïa ki samla.”
“Ha kine ki sngi kiba mynta, ka jingkyrduh kam kyrduh jam ka jur shaba palat, kumta donkam ïa ka Sorkar ban shimkhia ïa ki samla kiba kamai bad im ja na ki ar shaka Rapido, namar kane ka dei kawei na ki lad aikam aijam ïa ki samla ha kine ki sngi kiba mynta,” ong shuh shuh u Bah Sawkmie.
Kum ban shu pynkynmaw, dang shen ha ka 1 tarik u Naitung, 2025 ka Ministry of Road Transport and Highways (MoRTH) ka la pyllait ïa ki guideline ne ki jingbthah ban thaw ïa ki kyndon na ka bynta ka Sorkar Jylla ban ai laisen ïa ki nongkamai Rapido. Ka la ong ba ki Sorkar Jylla ki lah ban phaidien thymmai ïa kine ki guideline hapoh ka lai bnai.
Ka Clause 23.1 jong ka Motor Vehicles Aggregator Guidelines ka ong, “Ka Sorkar Jylla ka lah ban ailad ïa ka jingkamai lang ki non-transport motorcycles na ka bynta ka jingleit jingwan ki passenger,” kaba la bynrap ba kane kan ïarap pynduna ïa ka jingdheng kali, ka jingjaboh ka lyer, kan pynsuk ïa ki paidbah nongleit nongwan bad kan long ruh ka kabu ba kin im.
