Washington, Naitung:
Katkum ki khubor, la ong ba ki doktor kiba peitbniah ia ka koit- ka khiah jong u President ka U.S. u Donald Trump, ki la lap ba u don ia ka jingpang ha ki thied- ki jaw, hadien ba la peitbniah ia u da u doktor halor ka jingat ki bynta shapoh jong ki kjat jong u.
Haba pule ïa ka shithi na u doktor jong u Trump, u Leavitt u la ong ha ka jingïakren bad ki nongthoh khubor ba ka jingpeit bniah ïa ki kjat jong u president “ka la pynpaw ïa ka jingbym biang ki thied-snam, hynrei ki dei ki jait jingpang kiba ju jia khamtam ha ki briew kiba la palat ïa ka 70 snem ka rta.”
U Leavitt u la ong ba ym don “sakhi” ia ki jingpang kiba kham shyrkhei kum ki jingpang thied kiba jur kaba jylliew ne ka jingktah jur ia ki thied snam jong u. Ki eksamin ba la pyndep kim shym pyni dak eiei ban don ki jingshitom ha ki bynta jong ka shadem lane ha kiwei pat ki liang.
U Leavitt u la ong ba u Trump um shym la sngewkhia ne sheptieng haba iadei bad katei ka jingpang namar ba kam long kaba khyllah.
Katkum ka website jong ka MedlinePlus jong ka National Library of Health, “Ka jingbym biang ki snam ka dei ka jingpang ha kaba ki thied snam ki don jingeh ha ka ban phah biang ia ka snam na ki kjat sha u klongsnam.”
La ong ba u Trump u la nang kham shitom katba nang mih ki sngi, hynrei ki nongsumar ki la iathuh ba kam don jingma eiei ia ka koit- ka khiah jong u lada ki sdang sumar noh naduh mynta.
U Leavitt, u iathuh ruh, ba U Trump, u don ki dak shitom na lyndet jong ka kti jong u.
