Shillong, Naitung 20
Ka Kong Bibi Jyrwa kawei na ki nongshong die madan ha ka thaiñ Khyndailad ka la pynpaw ba ka don ïa ki sakhi-sabut halor ka jingshim pisa kawei na ki nongïalam jong ka Meghalaya and Greater Shillong Progressive Hawkers and Street Vendors Association (MGSPHSVA) na kiba shong die madan ha Khyndailad.
Haba ïakren bad ka Kong Bibi Jyrwa ka la kynnoh ba kawei ka nongïalam jong katei ka Association ka la shim bai wai be-aiñ na uwei u bar jylla uba kyrteng u Raju, ha ka dor T.1,000 shisngi.
Halor kane ka jingshim pisa be-aiñ na utei bar jylla, ka Kong Bibi Jyrwa ka la ong, ba nga don ki sakhi bad ka ïoh ruh ki ‘video’ bad dur ba pyni shai ba ki shim pisa be-aiñ na ki nongdie madan.
Ka Kong Bibi ka la ong ruh ba utei u bar jylla ïa uba la tip kyrteng kum Raju u la shim wai ïa ka dukan na katei ka nongïalam ki nongdie madan ha Khyndailad ba ju khot ieid ka Kongdeng, ha kaba ka la kynnoh ba ka ju shim pisa be-aiñ na utei u bar Jylla haduh T.1,000 tyngka shisngi.
“Ka la dep ban ïakren ruh hapoh ki Media ban pynshisha ïa kata ka jinglum pisa be-aiñ katei ka nongïalam na utei u Raju, bad utei u Raju ruh u la phla ba ka don shisha kum kata, ba u hap ban siew T.1,000 tyngka man ka sngi sha ka Kongdeng,” la ong ka Kong Bibi.
Ha kawei pat ka bynta, na ka liang ka Kongdeng ka la kynnoh ïa ka Kong Bibi ba ka la wanlam hi ïa uta u Raju ban shu pharep ba ka shim pisa be-aiñ T.1,000 tyngka shisngi. Kumta na ka liang ka Kong Bibi pat ban pynskhem ïa kane ka jingshah kynnoh ka la ong ba ka don ïa ka jingpynshisha ba ka Kongdeng ka shim pisa be-aiñ na utei u Raju, da kaba bynrap ruh ba ka jingkren bad phla jong utei u Raju ka la shai bha kdar.
Dang ha ka Sngi Saitjaiñ na ka liang ki nongïalam jong ka Association ki la kynnoh ruh ba ka Kong Bibi Jyrwa ka la leit ban kam trai ïa ka jaka shong die jong ki ha Khyndailad bad wan ban tim beit man ka sngi ïa kitei ki Nongïalam. Pynban na ka liang ka Kong Bibi pat ha ka Sngi U Blei ka la ong, ba kitei ki nongïalam ki dei ban ai ka jingpynshisha halor ka jingkynnoh ba ka leit ban tim ban tla ha dukan jong ki.
Nalor kane, ka Kong Bibi ka la byrngem ruh lada kim lah ban ai ïa ka jingpynshisha kaba shai halor ka jingkynnoh kan sa ujor ejahar pyrshah ïa ki.
Namar kata, ka la kyntu ïa ki bor synshar ba kin tohkit mardor bad ban pynsangeh noh ïa ka jingshim pisa be-aiñ, kaba pynsniew dur ïa ka Khyndailad kum ka jaka khaïï paidbah.
