Shillong, Naitung 20
U Organising Secretary jong ka Voice of the People Party (VPP) East Jaiñtia Hills District, Bah Damewanhi Rymbai, u la ong ba ka seng ka dang buddien haduh mynta ïa ka jingduh tulop ki nongtrei ka Jaiñtia Hills Autonomous District Council (JHADC).
U la ïathuh ba kane ka jingduh tulop ki nongtrei ka JHADC ka dang sah sa kumba khyndai bnai.
Shuh shuh u la pyntip ba ïa kane ka jingduh tulop wat ki nongtrei ka JHADC ki la leit ban ujor sha ka ïingbishar Meghalaya High Court.
“Ngi la buddien ïa ka jingduh tulop ryngkat ka jingïaid ryngkat bad ki nongtrei bad ki nongtrei ka JHADC,” u la ong.
U la ïathuh ba hadien ba ka VPP ka la buddien, u Myntri Rangbah ka Jylla ruh u la pynbna ban pyllait pisa sha ka JHADC kumba 19 klur tyngka bad hadien sa 20 klur tyngka kaba dei ka bhah jong ka council.
U la ïathuh ruh ba naduh ba la don ki MDC ka VPP, ki la wanrah ruh ïa ka jingkylli ha ïingdorbar ha kaba u CEM u la kular ban siew tulop man u bnai hynrei ïa kane ruh kam shym la treikam.Kumta u la ong ba ka seng ka hap ban leit ban pynkynmaw biang ïa ka Sorkar khnang ba kan lah ban pyllait ïa ka bhah jong ka council.
Kum ban shu pynkynmaw, kane ka jingduh tulop ki nongtrei ka JHADC ka la dei kawei ka mat ha ka ilekshon MDC ba dang shu dep mynta u snem ha kaba ka VPP ka la jop 8 ngut ki MDC ban shong ha ka liang pyrshah katba ka NPP bad UDP ki la thaw biang ïa ka EC hadien ba ki la ïatreilang biang.
