Shillong, Naitung 20
Ka Mawkasiang ka la bteng ïa ka jingjop ha ka U-20 Fourth Division 2025 ba la pynïaid da ka Shillong Sports Association (SSA) hadien ba ka la pynliem noh ïa ka Maw-ñianglah da 3-1 kol ha ka Pool 3 jong ka wat ba ar kaba la long ha ka sngi Saitjaiñ bad ban pynlong ïa katei ka kynhun ban jam sha ka quarter final.
Ha kawei pat ka jingïakhun ka Mawphlang ka la pynneh ïa ka jingkyrmen ban ïoh rung sha ka quarter final hadien ba ka la jop da 1-0 kol ïa ka Lumpyngngad ha ka Pool 4. Kane ka la wan urlong lyngba u Fedrick Wankhar uba la thep kol ha ka minit kaba 80.
Lyngba kane ka jingjop ka Mawphlang ka la khur 3 poiñ na ki ar sien ïakhun. Ka Lumpyngngad ka danghap ban ïakhun pyrshah ïa ka Laitkroh, kaba la jop ïa ka Mawphlang da 3-2 kol 15 tarik.
Haba phai sha ka jingïakhun kham hashwa, ka Mawkasiang ka la ïoh ban thep kol lyngba u Kyrmenskhem Mukhim (7), kumjuh u Hame-dao Nongtdu (19) bad u Lamshai Jana (55). Katba u Elnathan Teinam Lyngdoh (21) u la lah ban pynphai kylla shi kol na ka bynta ka Mawnianglah.
Te kumta lyngba kane ka jingjop ka Mawkasiang ka la khur 6 poiñ ha ka Pool 3, katba ka Mawñianglah bad ka Lummawbah ki dangïai bteng ïa ki jingshah rem. Ka Mawñianglah bad ka Lummawbah kan ïakynduh pyrshah ha ka 23 tarik mynta u bnai na ka bynta ban rai mano ban ïoh rung sha ka quarter final.
Ka jingïalehkai ha ka Sngi Ba-ar ha ka Pool 1 kan long hapdeng ka- Laitlulong pyrshah ïa ka Laitumkhrah (por 1 baje mynsngi), katba ha ka Pool 2 ka Lapalang kan ïakynduh pyrshah ïa ka Mawlynrei (4 baje nohphai sngi).
