Khliehriat, Naitung 20
Ka Umrasiang United SC bad Suchen Lumïarain SC ki la rung sha ka quarter final ha ka lympung ïalehkai 3rd Division Football League ba la pynïaid da ka East Jaiñtia Hills District Football Association (EJHDFA).
Ha ka jingïakhun pre-quarter final kaba la long ha ka sngi Saitjaiñ kaba la long ha madan artificial turf Diengshynrum kaba ha Khliehriat, ka Umrasiang United SC ka la pynliem noh ïa ka Moolang SC da 2-0 kol. Kane ka la wan urlong lyngba ki kol ba la thep da u Shining Rymbai ha ka minit kaba 38 bad u Jen Rymbai ha ka minit ba 47.
Haba phai sha kawei pat ka jingïalehkai pre-quarter kaba ar, ka Suchen Lumïarain SC ka la pynliem noh ïa ka Rymbai Pohskur da 4-3 lyngba ka tie-breaker da 4-3 kol hadien ba kine ki kynhun kim shym la lah ban thep kol haduh kaba kut ka jingïalehkai.
Ka jingïakhun pre-quarter kan bteng biang ha ka Lah Sngi U Blei hapdeng ka Moonongtdu SC pyrshah ïa ka Nongsning SC ha ka por 12:15 mynsngi, katba ka Musiang Rim SC ïa ka Wahsanphaw SC Sohkymphor ha ka por 3 baje nohphai sngi.
