Shillong, Naitung 20
U rangïalehkai barim ka Shillong Lajong Football Club, u Birendra Thapa um shimti kum coach ba thymmai ïa kane ka klob jong ka nongbah na ka bynta ki lympung ïalehkai ki ban wan, katba u George Vannie Lyngdoh Nongrang kum assistant coach.
Kane ka la wan hadien ba u coach uba na Spain u Jose Carlos Rodri -guez Hevia u la ïakhlad lok noh bad ka SLFC lyngba ka jingïasngewthuh jingmut lang bad ïa kane la pynbna ha u Jylliew mynta u snem.
U Birendra, ba la tip kum u Biru, u la don bad ka klob ha kawei ka kyrdan ne kawei pat ha ka bynta kaba bha tam jong ki 20 snem. U la sdang kum u rangïalehkai shwa ba un long ruh u nongpynïaid ne manager bad assistant coach.
U Biru u la mih noh na ka Lajong ha u snem 2019 na ka bynta ban shimti kum u assistant coach ha ka Mohammedan Sporting bad ka Sreenidi Deccan, hynrei u la wanphai biang sha ka Lajong ha u snem 2024.
Kumba ka paw, u Birendra u la ïatreilang hapoh u Hevia bad lyngba ka jingshemphang ka jong u la nangkiew ha ka rukom pynïaid kum asst. coach.
Ka jingtynjuh kaba nyngkong eh jong u ha kane ka aïom kan dei ka Durand Cup 2025, ha kaba ka jingïalehkai kaba nyngkong jong ka Lajong ka dangsah sa tang shi taïew. Mynshem snem ka Lajong hapoh ka jingpynïaid jong u Hevia ka la poi sha ka semi-final ha kaba ka la shah rem noh ha ka NorthEast United, kaba la rah ïa ka nam lahduh. Te mynta u snem, ka Lajong ka la don lang ha kajuh ka thup bad ka NEUFC.
Katba u George u la shah kyntiew kyrdan ban long kum u nongïarap jong u Birendra.
U George u dang don tang ha ka rta kaba 20 snem shaneng, u la long u asst. coach ha u snem ba la dep jong ka kynhun ba kyrpang jong ka Moham-medan Sporting kaba la ïashim bynta ha ka Calcutta Football League hashwa ba un iadon bynta kum u nongpynïaid jong ka Lajong.
Kum u rangïalehkai phutbol, u la ïalehkai na ka bynta ka Sawmer SC, Rangdajied United, Shillong Lajong bad kumjuh ruh ka kynhun ïalehkai U-21 jong ka Meghalaya ha ka Khelo India Youth Games 2020.
