Agartala, Naitung:
Ha ka jingshim ïa ka sienjam kum shi bynta ban tehlakam ïa ka jingwan rung beaiñ jong ki briew ba nabar, ki pulit jong ka West Tripura District ki la thaw ïa ka Special Task Force (STF) kaba don 15 ngut ki dkhot ban wad, ban ithuh, bad ban beh noh ïa ki briew kiba wan rung beaiñ na Bangladesh bad Myanmar.
Ïa kane ka kynhun treikam la thaw katkum ka jingbthah jong u Dr. Kiran Kumar, Superintendent of Police, West Tripura, bad ka kynthup ïa ki Ophisar-in-Charge jong baroh ki 15 tylli ki jaka treikam jong ki pulit kiba don ha kane ka district. Yn ïalam ïa ka da u Debasish Saha uba dei u Deputy Superintendent of Police ka District Intelligence Branch (DIB).
Ka Tripura ka ïasam lang ïa u khappud ba jrong 856 kilomitar bad ka ri Bangladesh, kaba pynlong ïa ka kum ka jaka kaba sngewkhia bad kaba kongsan bha ha kaba ïadei bad ka jingïaid lynti sha shiliang ki khappud. Ïa ka STF la bthah ban thmu ïa ki briew shimet kiba la shong la sah beaiñ ne kiba la shah kem hapoh ka distrik.
Katkum ka hukum ba la pynmih da ka sorkar, shisien ba la ithuh ïa u briew shimet kum u trai ri Bangladesh lane Rohingya be-aiñ hadien ba la wad bniah bha, ïa ki Biometrics (Fingerprints bad ki dur khmat) jong u dei ban shim bad thep ha ka Foreigners Identification Portal ba la pynneh da ka Ministry of Home Affairs (MHA).
La bthah ruh ïa u DySP (DIB) ban buh ïa ki jingthoh jingtip ba man ka taïew, man ka ar taïew, bad man u bnai, ban pynthikna ïa ka jingbuddien bad jingai jingtip kaba paka ïa baroh ki kam kiba ïadei bad kane.
Hadien kane, ïa ki briew ba ïohkem yn aiti noh sha ki bor pahara khappud (BSF) ban beh noh ne pynphai biang sha la ka jong ka ri.
Kane ka jingthmu ka wan hapdeng ka jingsngewkhia kaba nang jur halor ka jingshngaiñ jong ka ri bad ka jingkylla ha ka jingbun briew namar ka jingwan buhai shnong be-aiñ, bad ka ïahap bad ka polisi kaba kham jylliew jong ka sorkar pdeng ban buddien bad pynbeit ïa ka jingwan rung tuh shabar pud ha ka thaiñ Shatei-Mihngi.
