Shillong, Naitung 21
Ka kynhun ïalehkai ka Jylla ka la mad ïa ka jingshah rem ha ka jingïalehkai kaba nyngkong jong ka Junior Boys National Football Championship 2025 (Tier 1) na ka bynta ka Dr. BC Roy Trophy, hadien ba ka la shah pynliem noh ha ka Kerala da 5-1 kol ha ka lah sngi U Blei ha Amritsar.
Ha kane ka jingïakhun kaba nyngkong jong ka Group-B, ka Kerala ka la ïoh ban pynkhih jar nyngkong ha ka minit kaba 10 lyngba u Muhammed Mijuwad, hynrei hadien phra minit u Baniar Kharsahnoh u la lah ban pynïakhaid kylla na ka bynta ka Meghalaya.
Kane ka jingïakhaid ka la ïai neh haduh kaba kut jong ka kylla step. Hadien lai minit ba la bteng ïa ka jingïakhun jong ka kylla miet ka Kerala ka la ïakhun tyngeh ha kaba ka la thep biang ïa ka kol kaba lai lyngba u Jithu B.
Shuh shuh kane ka kynhun ka la bteng biang ha ka jingthep kol ha kaba u Mohammed Sinan u la thep ar kol ha kaba kawei ka dei lyngba ka penalty ha ka minit kaba 64 bad kawei pat ha kaba 76. Shwa ban wai ka Kerala ka la thep biang sa shi kol lyngba u Muhammed Hayan TP (84) na ka bynta ban khur syndon ïa ka jingjop.
Lyngba kane ka jingshah rem, ka Meghalaya kan hap ban wanphai da ka jingkhlaiñ bor ha ka jingïakhun kaba ar ka ban long ha ka sngi Balang pyrshah ïa ka West Bengal. Kane ka kynhun kaba na Bengal ka la sdang da ka jingjop ïa ka Tamil Nadu da 2-1 kol.
