Tehran, Naitung:
Katkum ki khubor, la ong ba ka jingpluh ha kawei na ki jaka saiñ umphniang ka Iran ha ka Sngi U Blei, ka la shim ia ka jingim jong uwei u briew uba don ha katei ka jaka ia kaba ki bor pyniaid ki dang phah wad bniah bad phah peit-thuh ia ka jingma kaba ap na katei ka jingjia. La ong ba dei ka jinglait jong ka umphniang na kawei ka jaka pyntuid umphniang ba dang pynbha jong katei ka karkhana saiñ umphniang ha Abadan, ka la wanrah ia katei ka jingpluh ha ka Sngi Saitjaiñ, ha kaba uwei u nongtrei jong katei ka karkhana u la duh ei noh ia ka jingim ha katei ka jingpluh. Ki nongpynlip ding ki la lah ban tem noh ia ka ding kaba klang hadien ar kynta ba ki la ïakhun tyngeh. U Deputy Speaker jong ka iing dorbar thaw aiñ ka Iran, Ali Nikzad, u la pyntikna ha ka Sngi U Blei ba ki don ruh ki nongtrei kiba la mynsaw ha katei ka jingjia.
Ka karkhana pynlang umphniang ha Abadan, kaba jngai kumba 670 Kilometre lane kumba 416 mer na ka nongbah Tehran, ka la sdang ban treikam ha u snem 1912. Katei ka karkhana, ka dei ka karkhana kaba heh tam ha ka ri Islam, kaba pynmih kumba 25% na ka umphniang jong ka ri da kaba saiñ bad pynmih palat 5,200,000 top ka umphniang ha ka shi sngi.
Haba iadei bad kane, la ong ba ki la don katto- katne ki jingjia pluh ding ha kylleng ka ri Iran ha ka taiew ba la dep ha ki iing sah bad ki jaka iadie-iathied, ha kaba ki bor pyniaid ki la ong ba bun na kitei ki jingjia ki dei namar ka jinglait jong ka lyer bih na ki tyndong lyer bad kumjuh ka jingthut ka bor ding ilektrik.
Ka Iran ka dei kawei na ki ri kaba pynmih buh tam eh ka umphniang ha ka pyrthei, wat la ki jingpynjari jong ki ri Sepngi ki la pynduna ia ka khaïi-pateng jong ka.
