Shillong, Naitung 21
U Myntri ba khmih ïa ka tnat Animal Husbandry and Veterinary, Bah AL Hek, u la pynskhem ba ka tnat, ki pulit ka jylla bad ki BSF ki la ïatreilang na ka bynta ban khanglad ïa ka kam khaïi masi tuh.
Haba kren sha ki lad pathai khubor ha ka Lah Sngi U Blei, u Bah Hek u la ong ba ki Deputy Commissioner (DC) jong ki district bapher-bapher ki dei ki bor ki ban pyntreikam ïa ka Prevention of Cruelty to Animal Act bad ban shim jingkitkhlieh na ka bynta ban pynsangeh ïa ki kam beaiñ.
U Bah Hek u la ong ba ïa ki masi ba la ïoh kurup la aiti sha ki bor ba dei khmih hadien ka jingïapynbeit ba la leh da ki DC.
U la pynthikna ba ïa ki kam ba kyrpang jong ka jingkhaïi tuh ïa ki masi yn sa pynbeit da kaba ïamir jingmut bad ki DC jong kata ka district.
Ha kaba ïadei bad ka jingpeit bniah ïa ka koit ka khiah jong ki mrad, u Bah Hek u la pyntip ba ka Sorkar ka dang buh ar tylli ki khyrdop talasi; kawei ha Ri Bhoi bad kawei pat ha Garo Hills na ka bynta ban buddien ïa ka koit ka khiah jong ki mrad kiba wan rung sha kane ka jylla. Ka khyrdop talasi ha Ri Bhoi ka la jan dep, katba ka jingtrei ka dang ïaid shakhmat ha Garo Hills.
U Bah Hek u la kynthoh ruh halor ka jingïakhih jong ka Dorbar Shnong Mawpat, kaba la pynlong ban pynsangeh noh ïa ka jingplie ïa kawei ka ïing ophis jong ka C&RD block.U la ban jur ba ka Sorkar ka thmu ban pynthikna ïa ka jingsiew kaba rit tam ïa ki nongtrei, katkum ka aiñ jong ka ri.
