Mawkyrwat, Naitung 21
Ka Hynñiewtrep Youths’ Council (HYC) Ranikor Area Unit lem bad ki dkhot ka Dirang Unit bad Shnongkalong Unit ha ka janmiet jong ka 19 tarik u Naitung, 2025 ki la ïoh ban bat kumba hynñiew ngut ki bar jylla ki bym biang ki kot ki sla na kawei ka kali Alto shimet kiba la kam ba ki mut ban leit trei bylla ha kawei ka karkhana saiñ dewïong kaba don ha Kulang ha South West Khasi Hills District.
Katkum ka jingïathuh u samla John Marweiñ, President HYC Ranikor Area Unit u la ong, ka seng hadien ka jingïoh jingtip kaba thikna ba ka don kawei ka kali kaba kit ïa ki bar jylla, ki lai tylli ki shnat treikam jong ka HYC ki la pynlong ïa ka jingpynap shrip ha Shnongkalong bad ki la ïoh ban bat kumba hynñiew ngut ki bar jylla ki bym don ïa ki kot ki sla naduh ki labour license, police verification bad kiwei kiwei.
U la ïathuh ruh ba ïa kitei ki bar jylla ka seng ka la pynphai noh wat hadien ba la don kiba phone ban pyllait ïa ki.
Kumta ka seng ka maham tyngeh ïa ki trai kiba ju wanrah nongtrei bar jylla ba ki dei ban pynbiang shwa ïa ki kot ki sla bad lada jia ba ki leh pyrshah, ka seng kam banse ban shim da ki sienjam kiba kham tyngeh. Ha kajuh ka por ka seng ka buh ka jingkyntu ïa ki briew kiba don nongtrei bar jylla ba ki dei ban pynbiang ïa ki jingdonkam namar ka seng ha kano-kano ka por kan sa leit ban hiar jurip sha ki thaiñ Nongjri bad Kulang.
