Khliehriat, Naitung 21
ka Lumshnong YWSC ka la khur jingjop, katba ka Kairang CSC, Lumshken SC, Mulieh YWSC Suchen bad ka Lakadong Ummat SCC ki la ïasam mar shi point ha ka 2nd Division Football League 2025 ba la pynïaid da ka East Jaiñtia Hills District Football Association (EJHDFA).
Ha kane ka jingïakhun kaba la long ha ka lah sngi U Blei ha madan artificial turf Diengshynrum kaba ha Khliehriat hapdeng ka Kairang CSC pyrshah ïa ka Lumshken SC kim shym la lah ban thep kol haduh kaba kut ka jingïalehkai.
Ha ka jingïalehkai kaba bud, ka Lumshnong YWSC ka la pynliem noh ïa ka Lumputhoi SC da 4-0 kol. U Rida O Rupai u la thep ar kol ha ka minit kaba 2 & 77, katba ïa kiwei pat la thep da u Shkemboklang Rupai (19) bad u Justine Niang (27).
Haba phai sha kawei ruh ka jingïalehkai hapdeng ka Mulieh YWSC Suchen bad ka Lakadong Ummat SCC ki la ïakhaid mar 3-3 kol. Ïa ki kol jong ka Mulieh la thep da u Hamedahun Lamo (5 & 57) bad Teibor Swer (67), Katba na ka Lakadong Ummat la thep da u Pynbha Miki (33), Seibormi Suchen (49) bad Eibormi Lyngdoh (56).
Ka jingïalehkai ha ka sngi Balang kan long hapdeng ka Lakadong Umlatdoh SCC pyrshah ïa ka Tpepswer SSWO ha ka por 10:45 mynstep, kumjuh ka Moolamanoh SC ïa ka Ratacherra CSC ha ka por 1 baje nohphai sngi bad ka Khliehmyntriang SCSC ïa ka Ryntihlang SC Brishyrnot ha ka por 3:15 baje nohphai sngi.
