Ha ka jinglong jingman jong ngi ki briew ngi ngeit ba u Blei u la thaw ïa u briew kynthei bad shynrang. Ka kynthei ne ka kmie ka ioh ïa ka bor ban ai buiñ ai sa ïa ki khun katba ki dang rit. U Kpa ne u shynrang pat u ioh ïa ka bor ban pyndap pynbiang ka bam ka sa ïa ka ïing ka sem kynthup ïa ka kmie bad ki khun.
Kine ki ïa trei lang bad pynlong ïa ka ïing ka sem kaba suk kaba saiñ bad kaba pahuh pahai. Kum shi kurim kim ju don ka mynsiem ïa bishni ïa pihuiñ kum shi lok ne tnga. Ka kmie ka leh ïa la ka kamram ban ri ban sumar bad ban ai buiñ ai dih ïa ki khun. U kpa u nongkamai uba wanrah ka bam ka sa kaba biang ha ïing ha sem. U kpa ne ka kmie ki don ka mynsiem ïa trei lang na ka bynta ka bha ka miat ki khun. Kim ju ïa pyni bor ne sngewpher ban ai ïa ka jait ka kynja sha u kpa ne ka kmie ruh. Ki ioh laitluid ban ai jait sha u kpa ne ka kmie ruh. Ym kumba long mynta u shynrang u kwah ai jait sha lade. Ka kynthei ruh ka kwah ban bat ïa ka jait sha lade. Kane ka dei ka jingmih ka ban ktah ïa ka jingïadei shi tnga napdeng u kpa bad ka kmie. Ki jaitbynriew kiba ai jait sha u kpa ne u shynrang ruh ki khun ki ioh buiñ ki heh ki san bad ki im bha im miat bad ki nang ki stad da ka jingsumar ka kmie bad u kpa. Kumjuh ki jaitbynriew kiba ai jait sha ka kmie ruh ki khun ki heh ki san bad ki im suk im saiñ kum kito ki khun kiba ai jait sha u kpa. Ki khun kim tip lada ai jait sha u kpa ne ka kmie ruh. Dei ka kamram jong u kpa bad ka kmie ban pynsngewthuh ïa ki khun ba kin ieit kumjuh ïa ka kmie bad u kpa. Ka jingai jait sha u kpa ne sha ka kmie kan ym ktah ïa ka ïing ka sem kaba suk ba kmen.Te kat kum ka rukom ka kmie ka dei ban ai buiñ ïa ki khun ym u kpa.
C. B. Iawphniaw
