Imphal, Naitung:
Ki bor pahara ha Manipur ki la kem ïa lai ngut ki briew kiba donkti ban die beaiñ ïa ki tiar siat ha Thangmeiband Khuyathong Polem Leikai kaba hap hapoh ka Imphal West District.
Ka jingleit khynra kaba la pynlong ha ka 20 tarik, Naitung, 2025, ka la ïarap ha ka ban ïohkem ïa u Konsam Uttam Singh ba la tip ruh kum u Abungo (18) jong ka Thangmeiband Lourung Purel Leikai, u Ngangom Rohit Singh ba la tip ruh da ka kyrteng kum u Thoi (23) jong ka Thangmeiband Polem Leikai bad Thingujam Devid Singh ba la tip ruh kum u Tony (28) jong ka Thangmeiband Lourung Purel Leikai.
Na ka jingpynjur ïa ka jingleit khynra hadien ba la ïoh ïa ka jingtip kaba bniah, ki shipai pahara ki la ïoh ban kurup ïa ki tiar siat bad kiwei pat ki tiar pyndonkam na kiba la shah kynnoh.
Ki tiar ba la ïoh ban kurup ki kynthup 70 song, ki kuli INSAS, kawei ka AK Magazine ba la dap kuli bad 26 song ki kuli AK, 2 tylli ki Magazine thylli jong ki INSAS LMG, kawei ka Magazine thylli jong ka suloi INSAS, kawei ka Magazine thylli jong ka 7.62mm SLR, 67song ki kuli .303, 100 song ki kuli .38mm bad 3 song ki kuli jong ka 7.62mm SLR.
Ki lai ngut kiba la shahkem ki don mynta ha kti jong ki pulit, bad ka jingtohkit ïa ki ka dang ïai bteng khnang ban lap ïa ka kynhun kaba kham heh bad ka tynrai ba kine ki tiar siat ki wan.
