Shillong, Naitung 21
Ka lympung ïalehkai SRGT 3rd Division Football League 2025 ba la pynïaid da ka Shillong Sports Association (SSA) ka la bteng biang ha ka lah sngi U Blei ha kaba ka Umrynjah SC, Lumparing SC bad ka Ïatylli SC ki la khur jingjop.
Ha ka jingïakhun jong ka Group-B, ka Umrynjah SC ka la pynliem noh ïa ka Rynjah SC da 5-2 kol. U Balviky Marngar u la khur ia ka hat-trick hadien ba u la ïoh ban thep ha ka minit kaba 44, 63 & 90+2, kumjuh u Wanborlang L Nongbri (2) bad ïa kawei pat la thep da u rangïalehkai ka Rynjah u Max Khongsit (68). Ïa ki kol na ka Rynjah la thep da u Venquish Pohlong (24) bad u Medonbanshan Mylliemngap (51)
Haba phai sha kawei pat ka jingïakhun kaba ar jong kane kajuh hi ka group, ka Lumparing ka la jop da 3-2 kol ïa ka Imson SC. Kane ka la wan lyngba ki kol ba la thep da u Kyrpanglang Mawlong (59), Joslang Lyngkhoi (67) bad u Sholinstar Syngkli (90+3), katba na ka Imson la thep da u Bosil Thabah (64) bad u Fidel Nongkhlaw (87).
Lyngba kane ka jingjop, ka Lumparing ka dangbat ïa ka kyrdan ba hakhlieh jong ka Group-B ha kaba ka la kamai 4 point, katba ka Umrynjah ka la wan balai watla ka la iaryngkat mar 3 point bad ka Umlyngka SC.
Haba phai sha ka jingïakhun jong ka Group-C, ka Ïatylli SC ka la pynliem noh ïa ka Gorkha Association da 2-1 kol. Kane ka la wan urlong lyngba u Joinborlang Kharumnuid uba la thep ha ka minit kaba 8 bad u Ïatyllibor Mynsong (73), katba na ka Gorkha la thep da u Yash Kanwar (67).
Da kane ka jingjop ka Ïaitylli ka dangïai bat ïa ka kyrdan ba hakhlieh da kaba kamai 6 point na ki ar sien ïakhun, katba ka Gorkha Association ka dangdei ka kynhun ka dangïai mad ïa ka nam rem.
Ka jingïalehkai jong kane ka lympung kan bteng biang ha ka sngi Ba-ar ha kaba ka Laitlyngkot SC kan ïakhun pyrshah ïa ka Lamlynti FC ha ka por 10:30 mynstep, katba ka pre-quarter final jong ka 4th Division (U-20) Football League 2025 kan long hapdeng ka Laitlulong SC pyrshah ïa ka Laitumkhrah SC ha ka por 1 baje mynsngi, katba ka Lapalang SC ïa ka Mawlynrei SC ha ka por 4 baje nohphai sngi.
