Shillong, Naitung 21
Ka lympung ïalehkai siat suloi ba la tip kum ka 10th Meghalaya State Shooting Championship 2025 ka la poi sha kaba kut ha ka 20 tarik mynta u bnai ha Prisition Indoor Shooting Range jong ka Assam Regimental Centre kaba ha Happy Valley, Shillong.
Ha kane ka jingïakop kaba la neh hynriew sngi lynter, ki la don kiba shispah ngut ki nongïalehkai kiba la wan na kylleng ka Jylla kum na Ri-Bhoi, East Jaiñtia Hills, West Jaiñtia Hills, West Garo Hills, North Garo Hills bad na East Khasi Hills. La phiah ïa kine ki jingïakop ha la ki jong ki kyrdan kata ka junior, youth, sub-youth, masters, senior masters bad super masters.
Ha katei ka sngi pynhap pyrda la ïadon lang u S.K Bhalla, ITS, Secretary ka North Eastern Council ha ryngkat ka jingïadon lang u Bah P.B War Nongbri, Astt. Director ka tnat ïalehkai, Vikram Malik, Co Founder & Director ka Sportality bad u Bah Dipshon Ryntathiang, Chairman Podium Com-mittee ka MSOA, ryngkat ki dkhot jong ka SAM kiba kynthup ïa u Bah John F Kharshiieng, Presedent, Davis NR Marak, Vice President, Bah Niel Sooting, General Secretary bad kiwei kiwei.
Haba ai jingkren ha katei ka sngi, u S.K Bhalla u la ai khublei ïa ka SAM na ka bynta ka jingpynïaid ïa kane ka lympung kaba jop. U la ai khublei ruh ïa baroh ki nongsiat na ka bynta ka jingïashim bynta, ka mynsiem ïalehkai ban pyni ïa ki sap jong ki. U la pynshlur ruh ïa ki nongïalehkai ba kin ïakhun ym tang ba kin shu kut tang ha ka Jylla bad National Level, hynrei ba kin long kiba paw wat haduh lympung ïakop shabar ri ruh kumjuh.
Ha kawei pat ka liang u Bah John F. Kharshiing u la kren shaphang ki jingkyrmen, ki lad ki lynti bad ki jingeh ha ka jingïalehkai siat suloi ha ka lawei ka ban wan.
U Davis Marak u la pynshai sha ki nongsiat suloi halor ki jingpynthymmai ba kongsan kaba thew sha ka jingpynkhreh na ka bynta ka 39th National Games 2027 ka ban long hapoh ka Jylla.
Ha katei ka sngi la sam ruh ïa ki khusnam sha baroh ki nongïalehkai kiba la khur ïa ki jingjop ha la ki jong ki kyrdan ïalehkai jong ki.
