Itanagar, Naitung:
Ka sorkar Arunachal Pradesh, ka la kyntu ïa ka sorkar pdeng, ba kan pyndep ïa ki jingkular ba kham hashwa, ha kaba ïadei bad ka jingpynïar ïa ka jingpynïasoh jong ki jingtreikam ki liengsuiñ ha ka Jylla, hashwa ka por ba la buh ban plie ïa ka jingtei bathymmai jong ka Terminal ha Donyi Polo Airport.
U Myntri ka tnat Civil Aviation ha ka jylla u Balo Raja u la buh ka jingkyrpad lyngba ka shithi kaba la thoh sha u Myntri ka tnat Civil Aviation jong ka sorkar kmie u Rammohan Naidu Kinjarapu.
Ka shithi, kaba la sam kopi bad ki lad pathai khubor ha ka sngi Palei, ka kdew shaphang ki jingkular ba la ai ha ki jingïalang ba la pynlong ha New Delhi ha u bnai Lber bad Jymmang mynta u snem.
“Phi la pynthikna da ka jingsngewrit ïa ngi ban pynrung ïa ki jingshakri ha ka kam liengsuiñ bathymmai sha kiwei pat ki nongbah ba shaphang Shathie bad kumjuh ruh ban sdang ïa ki jingshakri man ka sngi hapdeng ka Itanagar bad Delhi ryngkat bad ka jingplie ïa ka Terminal Building kaba thymmai jong ka kad liengsuiñ,” la ong u Raja ha ka shithi kaba u la thoh.
Nalor kane u la ong ba hadien ka jingpynthikna, ka sorkar jylla ka la ïasam ïa ka jingpynroi bad ki paidbah lyngba ki lad pathai khubor jong ka thaiñ, kaba la pynmih ïa ka jingkhmih lynti hapdeng ki nongshong shnong ha kaba ïadei bad ka jingpynbha ïa ki jingshakri ha ki liengsuiñ.
U Raja u la pyntip ba kane ka Terminal Building kaba thymmai ha Donyi Polo Airport kaba don ha Hollongi ka lajan dep bad la khmih lynti ban plie paidbah ïa ka ha ka taïew kaba nyngkong jong u Nailar.
U la kyntu ïa ka tnad ba dei khmih ba kan pynkloi ha ka ban pyndep bad ban pynurlong ïa ka jingkular ba la dep ban khlei hashwa na ka bynta ka jingmyntoi jong ki paidbah.
“Ki paidbah jong kane ka jylla khamta kibana shaphang Mihngi jong ka ri India ki la thrang slem bha ïa ka jingpynïasoh liengsuiñ kaba khlaiñ, bad khatduh ka la sdang ban urlong da ka jingplie ïa ka Donyi Polo Airport da u Myntri Rangbahduh ka ri u Narendra Modi ha ka 18 tarik u Naiwieng, 2022,” la ong u Myntri.
U la kdew ruh ba ka jylla Arunachal Pradesh ka dang pynkhreh ban pynlong ïa ka 3rd Northeast Aviation Summit ha Itanagar ha ka 5 tarik Nailur, 2025, ka kam pynroi kaba la ïakren ha ki jingïalang ba kham hashwa bad u Myntri ka sorkar pdeng.
U Raja u la pynkut da kaba pan ïa ka jingïatreilang bad jingkyrshan kaba bteng na ka tnad ban pynkhlaiñ ïa ka tnat liengsuiñ ha Arunachal Pradesh.
