Shillong, Naitung 21
Kawei ka longkmie kaba shong die madan ha lynti ïaid kjat ha Khyndailad ha ka Lah Sngi U Blei ka la pyneh triang hakhmat ki ophisar ka Shillong Municipal Board (SMB) ban ym kynriah na katei ka jaka ba ju shong die jingdie man ka por.
Kane ka jingpyneh katei ka longkmie hakhmat ki ophisar ka Shillong Municipal Board (SMB) ka dei hadien ba ki ophisar ki la leit ban pan ïa ka COV ha ka jingtalasi biang, bad katei ka longkmie kam pat don ïa ka COV kaba thymmai, hynrei ka don tang ïa ka COV barim ka bym long shuh bad kaba la kut ka por.
Kumta ki ophisar ka Shillong Municipal Board (SMB) ki la kyrpad ïa katei ka longkmie ba kan sngewbha ban lum noh shwa ïa la ki tiar, namar ba kam pat don ïa ka COV da kaba bthah ba kan sa wan ban shong biang tad haduh ban da ïoh ïa ka COV. Pynban na ka liang katei ka longkmie ka la pyni nia bad pyrshah da kaba ong, ngi la shong hangne la 35 snem, balei ngin shu kynriah kam ïahap?
Ha ka jingïakren, ki ophisar ka SMB ki la kren da kaba jai-jai ban pynsngewthuh ïa katei ka longkmie ba ka dei ban lum noh shisyndon, namar ba kam pat don ïa ka COV, da kaba ai por ruh ba lada kam kohnguh ban lum kin sa lum hi.
U ophisar u la ong ruh ngi wan hangne ban peit tang ïa kiba don ïa ka COV bad ïa ki bym pat don ngin ym shah ban shong die jingdie.
Kumta katei ka longkmie ka la pyneh da kaba ong, ba ngam kynriah namar ba nga la shong hangne la bun snem bad lada ki tan ïa nga sha thanat ruh ngan leit, ka bha ba ngan shong thanat bam jadai ban lait ka bylla.
Halor ka jingbym ïoh ïa ka COV na ka Municipal Board, katei ka longkmie ka la ïathuh ba ka la dep ban leit mih bunsien sha ophis ka Municipal hynrei ki shu bthah beit ban wan pat hadien. Ka la buh jingkylli, balei ki pynjah ïa ka kyrteng jong ka ? Kat haduh mynta ka khlem ïoh ïa ka COV bad wat ka jingthoh ruh ka la ai sha ka Municipal. Da kaba kynnoh ruh, ba ki briew ka tnad Municipal ha ka por ba ki wan ban jurip ha Khyndailad kim shym la wan ha ka dukan jong ka bad ki la ïaid lait.
“Ban shu wan phah khang ïa ki dukan mynta, hato ngim thngan?,” la ong katei la longkmie.
Shuh shuh katei ka longkmie ka la kynnoh ba ka jingbym ïoh ïa ka COV, ka lah ban don eiei sha lyndet bad ka dei ka jingleh shiliang jong ki briew ka tnad Municipal, namar ki briew ba dang shu wan dang mynno ki la ïoh ïa ka COV, katba ma ngi pat ba la shong la 35 snem haduh mynta ngim pat ïoh ka COV.
