Jowai, Naitung 21
Ka West Jaiñtia District Table Tennis Association (WJDTTA) ha ka 19 tarik mynta u bnai ka la pynlong ïa ka lympung ïalehkai kaba shi sngi ba tip kum ka 3rd District Table Tennis Championship 2025 bad Under-17 (Boys) Table Tennis Championship ha Indoor Hall Khimusniang, Jowai.
Ha kane ka sng la wan ïashim bynta da 24 ngut ki nongïalehkai bad ïa ka lympung la phiah ha ki ar bynta kata ka Open to All Category bad ka Under-17 Boys.
Ha ka Open to All Category la ïashim bynta da 18 ngut kynthup shynrang bad kynthei, katba ha ka Under-17 la ïashim bynta da 6 ngut ki nongïalehkai.
Haba phai sha ka jingïakhun phainal jong ka Under-17 Boy’s Single, ïa ka nam lahduh la ïoh ban rah da u Samehi Dkhar da kaba pynrem ïa u Garethly Dkhar. Katba ha ka jingïakhun kynhun la jop da u Garethly Dkhar bad Samehi Dkhar da kaba pynrem ïa u Corbah Khonglah bad Dasaki Thma.
Ha ka Men’s Singles ïa ka nam lahduh la ïoh ban khur da u Eraphael Dkhar, uba la lah ban pynliem ïa u Lammida O Passah, katba ha ka Men’s Doubles ïa ka nam lahduh la rah da u Eraphael Dkhar bad Jeffrey Litting da kaba pynliem ïa u Lammida O Passah bad Enangtei Ymbon. Shuh shuh haba phai sha ka jingïakhun kaba para marwei jong ki kynthei, ka Sakani Tariang ka la ïoh rah ïa ka nam lahduh da kaba pynliem ïa ka Hakawot-hi Phai. Ha ka Women’s Doubles ka Aquila Langbang bad Sakani Tariang ki la jop ïa ka Hakawot-hi Phai bad Pynhun Khyriem.
Katba haka Mixed Doubles ïa ka nam lahduh la rah da u Lammida O Passah bad ka Sakani Tariang hadien ba ki la lah ban pynliem ïa u Enangtei Ymbon bad ka Pynhun Khyriem. Ha ka jingïalang sam khusnam kaba la pynïaid da u Bah Patrick Lamare, Vice-President WJDSA la donlang ruh u kongsan Waheh Shnong Khimusniang u Bah Titos Bamon kumjuh ki nongïalam bad dkhot ka WJDTTA ba kynthup ïa u General Secretary Bah Aldrin Wahlang bad P. L Kharkongor.
U Bah Titos kum u kongsan ula kitbok kitrwiang ïa baroh ki nongïashim bynta bad kyntu ruh ban trei shitom bad ban nangpynjanai shuh shuh ïa ka sap ïalehkai ka jong ki khnang ba kin lah ban rah nam rah burom ïa ka shnong ka thaw bad ka ri ka muluk ha ki por ki snem ban wan.
