Pynmih hukum ka ED ban kurup ïa ki nongkynti ba T.20.28 klur ka CMJ University

Ka jingtohkit ka CID ka la shem ïa bun bah ki kam leh thok ha CMJ University, khamtam ka jingdie ïa ki degree thok, kaba la kynnoh pynïoh kamai haduh T.83 klur.

Shillong, Naitung 21

Ka Directorate of Enforcement (ED), Shillong Sub-Zonal Office, ka la pynmih ïa ka hukum ban kurup shuwa shipor (Provisional Attachment Order) ïa ki nongkynti ba shongdor T.20.28 klur jong u Chandra Mohan Jha, Chancellor ka CMJ University, bad ki bahaïing jong u hapoh ki kyndon ka Prevention of Money Laundering Act (PMLA), 2002.

Ka hukum ba la pynmih ha ka 3 tarik Naitung 2025, ka kynthup ïa 4 tylli ki ïing ha New Delhi kiba shongdor T.19.29 klur bad ka pisa ba T.1 klur ba don ha bank. Ka ED ka ong ba kine ki nongkynti ki don jingïadei bad ki kam bymman ba la leh da u Jha bad kiwei-kiwei lyngba ka jingdie tuh ïa ki degree thok napoh ka University.

Ka ED ka la pynlong ïa ka jingtohkit halor ka ejahar ba la mudui da ka CID Police Station, East Khasi Hills, kaba la pynshong nongrim halor ka jingujor jong u ophisar IAS MS Roa, kaba long katkum ka jingbthah u Lat barim ka Jylla, uba shakri kum u Visitor ka University.

Ka jingtohkit ka CID ka la shem ïa bun bah ki kam leh thok ha CMJ University, khamtam ka jingdie ïa ki degree thok, kaba la kynnoh pynïoh kamai haduh T.83 klur.

Kane kam dei ka sien ba nyngkong ba ka ED kan kurup ïa ki nongkynti ha kane ka jingjia. Ha ki hukum kurup nongkynti ba la dep, kaba la pynmih ha ka 31 tarik Naiwieng 2017, 30 tarik Naiwieng, 2021 bad 11 tarik Naitung, 2024, ka ED ka la kurup ïa ki nongkynti kiba shongdor haduh T.27.66 klur, T.13.54 klur bad T.7.56 klur. Baroh kine ki dei kiba don jingïadei bad u CM Jha bad ka ïing ka sem jong u.

Kane ka jingkurup ba mynta ka dei kaba la leh da ka ED hadien ka jingpynlong ïa ki jingkhynra ha kylleng ki jaka ha u bnai Nohprah 2024, ha kaba ka la ïoh ban kurup ïa ki bank account bad nongkynti.

Ka kynhun tohkit ka la lap ruh ba T.1 klur la phah sop-sop da u Jha sha ka account ki bahaïing ha ka 16 tarik Nohprah, 2024 ban lait na ka jinglap. Ïa kane ka pisa la lap pat hadien bad ka dei shibynta ha ka jingkurup ba mynta.