Guwahati, Naitung:
Kum shi bynta ban ïakhun pyrshah halor ki kam khaïi briew, ka kynhun na East Guwahati Police District (EGPD), kaba don ha Dispur Police Station ha Assam, da ka jingtrei shitom ka la lah ban wanrah ïa ka jingjop halor ka jinglah ban khanglad ïa ka kam khaïi briew bad ïoh ban pyllait ïa ki san ngut ki lanot na kti ki riewbymman ha ka janmiet jong ka sngi U Blei.
Kum shi bynta ban pyntreikam hadien ka jingïoh jingtip na ki kynhun wadbniah, ka kynhun jong ki pulit ka Dispur ka la sdang ïa ka jingkhynra kaba jur ha kaba kane ka la ïarap ha ka ban ïohkem ïa ki saw ngut ki runar kiba la donkti ha ka kam khaïi briew.
Kine kiba la shahkem ki dei kiba la tip kyrteng kum u Hemanta Borah (32) jong ka Chatia, u Jainur Ali (38) jong ka Dodora, u Aminul Islam (36) jong ka Lakhipur, bad kawei ka briew ïa kaba ym pat lah ban ïoh ïa ka jingtip kaba bniah shaphang jong ka. Kine baroh saw ngut ki dang don mynta ha kti jong ki pulit.
Ki san ngut ki lanot kiba la shah khaïi na ka bynta ki jingthmu bym lah ban tip, la lah ban pynlait im da kaba suk ha ka por ba pynlong ïa ka jingkhynra.
Ki bor pynïaid ki la pynthikna ïa ka jingshngaiñ na ka bynta jong ki bad ki dang ai ki jingïarap kiba donkam, kynthup ïa ka jingïasyllok bad ka jingpynbha pat ïa ka jingim jong ki.
Kum shi bynta ban pynshisha halor kane, ki pulit jong ka Dispur ki la pynthikna lyngba ka jingthoh ha ka Social Media ha ka rynsan X ba la sdang ïa ki jingtohkit katkum ka aiñ pyrshah ïa kine ki briew kiba la shahkem katkum ki kyndon aiñ ba ïadei bad ki kam runar jong ki.
Ka jingtohkit kaba kham bniah ka dang ïaid shakhmat ban lap ïa ka jingdon jong ka kynhun khaïi briew bad ban lap shuh shuh ïa kiba donkti kum ha kine ki kam beaiñ.
