Nongpoh, Naitung 21
U MLA ka Nongpoh konstitwensi, u Bah May-ralborn Syiem ha ka lah sngi U Blei u la leit ban jurip ïa ka jingpyntrei ïa ka Synthetic Football Turf kaba dangïaid shaid shaid ha Umbuda, Ri Bhoi District.
Ha kane ka jingleit jurip la synran ryngkat lang ruh da ki nongïalam shnong bad nongïalam jong ki sports club jong ka shnong Umbuda bad Mawroh lem bad ki Engineer na ka State Sports Council of Meghalaya.
Haba kren sha ki lad pathai khubor hadien katei ka jingjurip, u Bah Mayralborn Syiem ula pynpaw ïa ka jingsngewkmen ba ka jingpyntrei ïa kane ka madan phutbol ka la ïaid shaid shaid bad pyntip ruh ba ka jingdep ïa ka kam ka long palat ïa ka 75-80 percent bad kyrmen skhem ba ha kine ki khyndiat bnai ki ban sa wan, yn sa lah ban plie paidbah noh ïa ka khnang ba kan long ka jingmyntoi ïa ki khun samla jong ka thaiñ.
Shuh shuh, u Bah Syiem ula ai ruh ka jingkhublei kyrpang ïa ki nongïalam shnong bad sports club jong ka shnong Umbuda bad Mawroh kiba la ai ïa ka jingïatrei lang na ka bynta ka jingïaid beit ïaid ryntih jong ka jingpyntreikam ïa kane ka madan ïalehkai, kiba la kwah ruh dik dik ban pyndep noh.
Na ka liang u Rang-bah Shnong ka Umbuda, u Bah Cleophas B. Syiem u la pynpaw ïa ka jingsngewkmen halor ka jingshim khia u MLA, Bah Mayralborn ban pynlong ïa ka jingjurip na ka por sha ka por khnang ba ka kam kan ïaid beit ïaid ryntih bad ai ruh ïa ka jingkhublei sha ki ophisar jong ka tnad ïalehkai ka jylla kiba sngap bad pyntreikam ïa ki jingai jingmut jong ki nongïalam shnong bad klob jong ka shnong Umbuda bad Mawroh.
