Tura, Naitung 21
Ha kawei ka jingkhynra pyrshah ïa ka jingjyllei u drok, ki pulit ka West Garo Hills ha ka step Sngi U Blei ki la ïoh kem ïa 3 ngut ki suba nongkhaïi drok na kawei ka ïingwai kaba ha Phulbari jong kane kajuh ka distrik.
Katkum ka jingïathuh ki pulit, katei ka jingjia ka la jia ha ka por kumba 6:20 baje mynstep ha ka por ba kitei ki suba nongkhaïi drok ki dang shong jahthait ha katei ka ïing wai.
Ka kynhun ANTF jong ka distrik ka la pynlong ïa ka jingkhynra ha katei ka ïing ha kaba ka la ïoh kurup ïa ki mar khaïi tuh ba la suba u drok ‘heroin’ uba khia kumba 95.78 gram ryngkat bad ka pisa kaba T.1,53,570 na ki.
Ha kajuh ka por, la kurup ruh ïa 2 tylli ki ‘I-phone’, 2 tylli ki tyndong ba thylli, ki dawai, kawei ka ‘phone’ (keypad phone) bad ki kot ki sla.
Kitei ki briew kiba la shah kem ki dei kiba la tip kyrteng kum u Rochan Ali (24 snem ka rta), u Rofikul Rahman (31 snem ka rta) bad u Abhijit Rabha (24 snem ka rta) – baroh ki dei na ka thaiñ Paltan Bazar kaba hap hapoh ka Kamrup distrik jong ka Assam. Kine baroh 3 ngut ki la shah pynngat hapoh ka aiñ NDPS.
