Shillong, Naitung 21
Ka Tournament Committee jong ka Shillong Sports Association (SSA), ka la shim ïa ka rai ba kan khate 3 point pyrshah ïa ka kynhun ïalehkai ka Laitumkhrah SS&CC, kaba la wan hadien ka jingshah ujor (protest) ha ka kynhun ïalehkai jong ka Golflink SC.
Kat kum ka kyrwoh kaba la soi da u Bah Samram Syiem, Asst. General Secretary ka SSA, u la pyntip ba ïa kane ka rai ban khate lai point pyrshah ïa ka kynhun jong ka Laitumkhrah SS&CC ka long hadien ba ka Golflink SC, ka la wan shakhmat ba kan ujor ne protest ïa ka jingsei madan ïa ki 4 ngut ki rangïalehkai ba kynthup ïa u Dabetskhem Rympei, Mebankhraw Nongrum, Mebakor Ïawphniaw bad ïa u Yeomanry Son Shadap, halor ka jingkynnoh ba la pynmih madan ïa kine ki rangïalehkai khlem da pyndep ïa ka kyndon jong ka Inter Club Transfer (ITC) jong ki nongïalehkai.
Na ka liang ka SSA ka la ïoh pdiang ha ka sngi ba ka kynhun ïalehkai ka Golflink SC ka la mih madan ba kan ïakhun pyrshah ïa ka Laitumkhrah SS&CC ha ka lympung ïalehkai Fourth Division U-20 Football League 2025, kaba la long ha ka 18 tarik mynta u bnai, da kaba sei madan artad ruh ïa kitei ki saw ngut ki rangïalehkai, kiba la pynkheiñ ïa ka kyndon jong ka 28 Football Tournament Rules ka SSA.
Te kumta da kane ka jingpynkheiñ ïa kane ka kyndon, ka rai jong ka Tournament Committee kam shim la shu kut tang ha ka ban khate point ïa ka Laitumkhrah SS&CC, hynrei ka la daiñ artad bad ka la khang shi syndon haduh shi snem kynthih ïa kitei ki rangïalehkai phutbol.
