Shillong, Naitung 21
Kawei ka heprit kaba dang 6 snem ka rta na Kharkutta, North Garo Hills District ka la shah rahbor ha uwei u briew najan ka ïingsah jong ka ha ka Sngi Saitjaiñ ka 19 tarik u Naitung 2025 bad haduh mynta ki pulit bad ki nongshong shnong kim pat lap ksai ïa katei ka khynnah bad ïa utei uba la rahbor.
Ïa kane ka khynnah la ïohi khatduh hajan ka ïingsah jong ka, ha ka por kumba 11 baje eiei mynstep bad hadien kata ka la shah pynbiej ha utei u briew uba la rah noh ïa ka.
Na ka liang ki baha-ïing jong katei ka heprit ki la kam ba ki ithuh ïa utei u briew bad ki la buh ka jingujor pyrshah ïa u.
Ka jaka ba kane ka khynnah ka shah rahbor ka don hajan ka khlaw kaba rben kaba la suba ba baroh ar ngut ki lah ban don hapoh katei ka khlaw, kaba la pynlong pat ïa ki pulit bad ki nongïarap ban shem jingeh ban lap ïa kane ka heprit kumjuh ruh ïa utei nongrahbor.
Haduh ba pynmih ïa kane ka khubor ym pat shym la lap ksai eiei ïa kane ka heprit wat haba la pynlong ka jingwad kaba jur.
U SP ka North Garo Hills, Swapnil Pawar u la ong, ba na ka liang ki pulit bad ki nongshong shnong ki la pynlong ka jingwad kaba khlem sangeh ïa kitei baroh ar ngut, hynrei kim lap ksai eiei ruh, namar ka jaka ka long kaba shem jingeh ban wad.
“Ngi la kyrpad ban wanrah da ki drone na Tura bad na Shillong, ngi kyrmen ba da kane ngin sa lap ksai noh ïa kitei ar ngut,” la ong u SP.
Ha kajuh ka por ki nongshong shnong ka Kharkutta ki la pynrem jur ruh ïa kane ka jingjia wat haba ki dang ïai bteng ban wad ïa kane ka heprit.
Ki don ki nongshong shnong kiba tieng ba ïoh ba kan jia eiei kaba sniew ïa ka, hynrei wat la katta ruh ki la pynpaw ba kin ïai bteng beit ban wad ïa kane ka khynnah haduh ban da ïoh kumjuh ruh ban wad ïa utei u runar ryngkat bad ki pulit.
