Shillong, Naitung 21
Ki kam tuh kam thiem ki la nang bteng na kawei ka sngi sha kawei pat. Dang ha kine ki sngi, la sakhi biang ïa ka jingshah tuh jong ki kali ar shaka na kylleng ki bynta jong ka nongbah Shillong bad ruh na kiwei ki district jong ka jylla.
Katkum ka khubor ba la ïoh na ka website ki pulit, la ong ba u Edousios Kyrsian u la ai ka jingujor ba ha ka step jong ka 18 tarik mynta u bnai, ki runar bym lah ban ithuh ki la tuh ïa kawei ar shaka kaba don ïa u registration number ML05-AE-0770 kaba dei trai da u para jong u na Mawlai Mawdatbaki Pata, Shillong.
Ha kawei pat ka khubor shah tuh, u Bah Robertseven L Nonglait u la ai ka jingujor sha ki pulit ba ha ka miet jong ka 15 tarik mynta u bnai, ki runar bym lah ban ithuh ki la tuh ïa ka arshaka ka jong u, kaba don ïa u registration number ML05-AD-5198 na Wahheh, Shillong.
Kumjuh, na ka liang jong ka Kong Adarosa Lamare ka la ai ka jingujor sha ki pulit ba ha ka 17 tarik mynta u bnai, ha ka por kumba 2.21 dang step, ki runar bym lah ban ithuh ki la tuh ïa ka arshaka jong ka, kaba don ïa u registration number ML04-E-0838 na ka jaka sah jong ka ha Moowakhon Mihmyntdu ha West Jaiñtia Hills.
Ha kawei pat ka khubor, u Bah Sarvesham B Thangkhiew u la ai ka jingujor sha ki pulit ba ha ka 17 tarik mynta u bnai, ki runar bym lah ban ithuh, ki la prong tuh hapoh ka ophis P Marbañiang Service Station kaba don ha Fire Brigade, Shillong bad ha kaba ki la ïoh ban tuh ïa ka pisa kaba long haduh T.60,000/-.
