Shillong, Naitung 21
Ka Meghalaya Human Rights Commission (MHRC) ka la shim da ka ‘suo moto’ case halor ka jingshah pynïap dusmon jong kawei ka samla ha East Garo Hills District.
Kane ka jingjia kaba ishyrkhei ka la jia ha ka thaiñ Dawa Matchakolgre ha Williamnagar ha kaba uwei u briew ba kyrteng u James R Sangma, u la pom da ka wait ïa katei ka samla kaba dang 19 snem na ka khlieh ha ka jaka paidbah.
Ka Commission ka la bthah ïa u Superintendent of Police jong ka East Garo Hills ban aiti ïa ka kaiphod kaba bniah halor kane ka kam ha ka sien shong bishar ban wan. Ïa kane la pyntip da u Secretary jong ka MHRC u L Ch Marak ha ka Lah Sngi U Blei.
