Imphal, Naitung:
Ka kynhun National Investigation Agency (NIA) ka la shimti ïa ka jingtohkit halor ka jingdon jong ka jingjia shah lute ki tiar siat na ka ktem shipai 5th India Reserve Battalion (IRB) kaba don ha Chingarel Tezpur ha Manipur’s Imphal East.
Kane ka jingjia, kaba la jia ha ka miet jong ka 13 tarik, Rymphang, 2024, ka dei kaba la donkti bad ka kynhun runar-khamtam eh ki samla-kiba la hiar thma ïa ka jaka sah jong ka IRB kaba hap hapoh ka jingkhmih jong ka thanat pulit ha Lamlai bad ki la knieh jubor ïa ki tiar ïaleh.
Kane ka jingjia, ka la wanrah ïa ka jingïakynad hapdeng ki paidbah bad ki kynhun shipai pahara, ha kaba ki la mih ki jingïasiat ba markylliang ha kane ka jaka.
Hadien ba la wan ka hukum na ka Union Ministry of Home Affairs, ka kynhun NIA ka la buh biang ïa kane ka mukotduma, ha kaba nyngkong la ujor ha thanat pulit ha Lamlai hapoh ki kyndon bapher bapher jong ka Indian Penal Code (IPC).
Kumba dei ka rukom treikam, ka kynhun NIA ka la ujor sha ka ïingbishar jong ka NIA ha Manipur ban bthah ïa ki pulit jong ka Lamlai ban aiti ïa baroh ki kot ki sla kiba ïadei bad ka mukotduma bad ki tiar ba la ïoh ban kurup ne ki jingpyni sha u Investigating Officer jong ka NIA.
Hashwa, kata ha ka 19 tarik, Rymphang, 2024, ka sorkar Manipur ka la hukum ban pynlong ïa ka jingtohkit Majisterial ban tohkit bniah halor ka jingjia.
Kumba la khmih lynti la ong ba ïa kiei kiei baroh kiba lap na ka jingpynlong ïa ka jingtohkit, yn sap hah hapoh ki 30 sngi naduh ba la pynmih ïa ka hukum.
Na ka jingkhmih bniah ïa ki kaiphot ba la wanrah da ki bor ba dei khmih, la ong ba ki la don kumba 6 ngut ki briew kiba la shahkem namar ka jingkynnoh ha kane ka kam lute.
Nalor kine, ki la don shuh sa 7 ngut kiwei pat na ka kynhun IRB kiba la shah weng kam ha kaba ïadei bad ka jingbym lah pynbiang ïa ka jingpahara bad ki jingai jingïada.
Kumba la buh jingkheiñ, la ong ba haduh mynta, ki bor pynïaid ki la ïoh ban kurup bun tylli ki tiar ba la shah lute, kynthup saw tylli ki suloi INSAS, kawei ka suloi AK Ghatak 2, ki SLR Magazine, bad 16 tylli ki synduk jong ki kuli 9 mm ha kaba la suba ba ki la shahtuh na katei ka ktem IRB.
