Shillong, Naitung 21
U Myntri ka tnad pule-puthi ka Jylla, u Rakkam A. Sangma u la kyntu ïa u nongïalam ka liang pyrshah bad Myntri Rangbah barim ka Jylla, Dr. Mukul Sangma ban pyndonkam ïa ka pisa na ka skhim MLA ha ka ban shna pynbha ïa ki skul kiba la jot rathai ha ka jaka ban shu kynnoh kulmar kumne-kumtai.
U Sangma u la ban jur ba uwei-pa-uwei u MLA u lah ban wanrah jingkylla da kaba mang pisa na bynta ban shna pynbha bad tei ïa ki skul.
U Myntri u la kdew ruh ïa la ki jong ki jingpyrshang, da kaba pynpaw ba u la shna pynbha ïa 45 tylli ki skul ‘Ad-hoc’ bad SSA ha konstitwensi lajong da kaba pyndonkam ïa ka pisa na ka skhim MLA, ha kaba kawei-pa-kawei ka skul ka la ïoh T.2 lak na ka bynta ban tei pynbha.
Na ka liang u Myntri u la kyrpad ba baroh ki MLA kynthup ïa u nongïalam ka liang pyrshah ba kin pyndonkam ïa ka pisa SRWP jong ki ha ka ban shna pynbha ne tei ïa ki skul.
“Lada uwei-pa-uwei u MLA u rai ban shna pynbha ne tei ym duna ïa 50 tylli ki skul man u snem (kan long ka jingïarap kaba khraw ban pynbha ïa ki jingtei ha ka pule-puthi hapoh ka Jylla). Ngan kyrpad da kaba sdang na u nongïalam ka liang pyrshah ban sngewbha pyndonkam hok ïa ka pisa SRWP jong u ha ka jaka ban kynnoh ïano-ïano bad ba un leh ïa kaei kaba u kren,” ong u Sangma haba kren sha ki nongthoh khubor.
U Myntri u la kdew ruh ïa ki jingeh ba ka Jylla ka ïakynduh, da kaba pynpaw ba jan 50% na 14,000 tylli ki ïingskul ki la julor.
“U kpa jong nga u dei u nonghikai skul. Ym shym la tei ïa kano-kano skul Sorkar Lower Primary ha ka por jong u. I kumba ym don mano-mano ruh ba kitkhiah. Hynrei ha kine ki 4-5 snem ba la dep hapoh ka jingïalam jong u Myntri Rangbah ka Jylla, u Conrad K. Sangma, ka Sorkar ka la rai ba yn shna pynbha ïa baroh ki skul Sorkar Lower Primary bad yn ai ruh ïa ka ïingmala bathymmai. Ka la urlong ruh bad ka don ha ka jingpynkhreh kam,” u la ong haba bynrap, “Kam long kaba suk namar ki don kumba 14,000 tylli ki ïingskul bad na kane, tang 3000-4000 tylli la lah ban pynurlong mynta bad sa 60-70% ki dang sahteng kynthup ïa baroh.”
U la kynnoh ruh da kaba ong, “Namarkata, u nongïalam ka liang pyrshah u lah ban sngew-wit ban ïohi ba kine ki kam baroh ki wan jia mynta namar ha ka por jong u um shym la lah ban leh shibun. Ka long ka sakhi halor kaei kaba u la leh ha ki 8 snem ba la leit haba u dang long Myntri Rangbah.”
Shuh shuh u Myntri u la kyrpad ïa baroh ki MLA bad MP ba kin buh hakhmat eh ïa ki kam kiba tei ban ïa kaba kynthoh, da kaba ai jingmut ba kin mang pisa ban tei bad shna pynbha ïa ki skul na bynta ka bha ka miat jong ka lawei ki khynnah skul.
