Shillong, Naitung 21
Ki Nongshong Shnong jong ka Mawpat ha ka jingïalam jong u Rang-bah Shnong, Bah Juda Wahlang ha ka step jong ka 21 tarik Naitung, 2025, ki la mih paidbah da kawei ka sur ban pynpaw ïa ka jingpyrshah kaba jur halor ka jingthmu ban plie paidbah ïa ka ophis thymmai jong ka Mawpat Community & Rural Development Block kaba don ha ka shnong Umsarang.
Ha kane ka sngi, ki paidbah naduh ki longkmie longkpa haduh ki khun samla ka shnong ki la mih shakhmat ha ryngkat ka jingrah ïa ki lama ïong ban pynpaw ïa ka jingpyrshah kaba jur halor kane ka jingthmu da kaba ong ba ka tnat C&RD Block kam shym la burom satia ïa ki jingïateh soskular bad ka Dorbar Shnong Mawpat bad ha kaba ki la pyneh beit triang bad khlem ailad satia ban plie ïa kane ka ophis Block.
Na ka liang ki paidbah ynda ki la poi hakhmat ka ophis thymmai jong ka C&RD Block, la sakhi ba ki bor Majistor bad ki bor Pulit ka East Khasi Hills ki la pakhang ïa ki paidbah ban rung shapoh ka phyllaw hynrei ki paidbah ki khlem phet satia na katei ka jaka bad ki la ïeng noh harud jong ka surok bad rai ruh ba kin nym shah ïano-ïano kiba thmu ban rung shapoh ka phyllaw jong katei ka ophis.
Ïa kane ka ophis thymmai la thmu ban plie paidbah da u Myntri ka tnat C&RD, u AT Mondal bad u MLA ka Pynthorumkhrah bad uba dei ruh u Myntri ka tnat Fisheries ka Sorkar Jylla, u Bah AL Hek.
U Rangbah Shnong ka Mawpat, u Bah Juda Wahlang u la ong, ka Sorkar bad ka tnat C&RD Block ka dei ban pynurlong shwa ïa ki mat jingdawa bad ki ïateh soskular da kaba kren shai ba ka Dorbar Shnong kan nym ailad satia ïa ka tnat ba kan plie ïa katei ka ophis treikam.
Na ka liang ki nongshong shong ruh kila ong ba ka Sorkar kam dei ban pynlong kamkai ïa ka soskular ba la ïasoi bad ka Dorbar Shnong.
“Phi mut ngi u paidbah jong ka Shnong ngi dei kiba biej? Kynmaw, ngim biej”, pyrta ki paidbah da kaba pynrem jur ruh ïa ka Sorkar bad ïa u nongmihkhmat ka thaiñ.
Hadien katto-katne por eiei, la wan poi u Bah AL Hek ha ryngkat bad u AT Mondal ban rung shapoh ka phyllaw bad ban plie ïa katei ka ophis thymmai hynrei ki paidbah ki khlem ailad da lei-lei ban rung ïa kitei ki Myntri ka Sorkar Jylla shapoh katei ka ophis thymmai.
Watla ka la don ka jingpyrshang na ka liang u Bah AL Hek bad u AT Mondal ban bsuh lyngba ki paidbah hynrei ki longkmie ki la khynñiat ïa baroh arngut ki Myntri ha kaba ka la mih ruh ka jingïapyninia hapdeng u Bah Hek bad ki nongïalam shnong ka Mawpat bad na ka liang u Rangbah Shnong u la kren da kaba shai ba kitei ki Myntri ki dei ban mih noh na katei ka jaka khlem da bun ktien shuh.
Wat hadien ba u Myntri ba dei peit ïa ka tnat C&RD, u AT Mondal u la pynshai paidbah bad kular ba ka Sorkar kan sa pynbeit bad peit ïa ki jingdawa jong ki hynrei kim shym la sngap ïa kata hynrei ki la ïeng skhem ba kin nym ailad satia ïa kitei ki Myntri ban plie ïa katei ka ophis thymmai.
U Rangbah Shnong u la kren markhmat ruh bad u Bah AL Hek da kaba ong ba kum ka Dorbar Shnong bad ki nongshong shnong kin ailad ïa ki Myntri ba kin plie ïa katei ka ophis bathymmai tad haduh ba ynda ka jingmong ka dohnud ki paidbah la dep ban sop spaiñ ïa ka.
Shuh-shuh, u Rangbah Shnong u la ong ba ka roi ka par kam dei ban wan ha ryngkat ka jingbym kheiñ snep ïa ka bor shnong bad ki nongshong shnong da kaba bynrap ba ka Sorkar kam treh ban pynbeit ïa ki mat ïakren kiba kum ka Dorbar Shnong ka la kdew.
“Namar haba ngi ai ïa kane ka jaka, ngim shym la khmih lynti da kane ka lynti. Ngim kwah shuh ban ïakren hynrei lada phi dang kwah ban plie ïa ka ophis jong ka Block, phi donkam ban ai da ka jingthoh namar ngi kum ka shnong ruh, ngi ai da ka jingthoh,” ong u Rangbah Shnong.
Shuh-shuh, u Rangbah Shnong u la ong ba lada na ka liang ka tnat C&RD Block lada ka kwah ban plie ïa katei ka ophis treikam, ka dei ban pynbiang ïa ka jingdawa jong ka shnong lym kumta ka shnong kan nym ailad satia ban plie ïa katei ka ophis.
Kham hadien ka jingïapyni nia hapdeng u MLA bad ki nongïalam ka Dorbar Shnong kaba la neh katto-katne por eiei, na ka liang u Bah AL Hek bad u AT Mondal ki la mih noh na katei ka jaka bad ha kane ka por, ka la mih ruh ka jingthab kti na ki paidbah nongshong shnong.
