U snem 2025 u la dei shisha u snem uba kynsha bad uba shyrkhei bha. Wat la ki dang ïaid tang hynriew tylli ki bnai ha une u snem ba mynta, ngi la sakhi ïa ki jingduh jong kiba bun tylli ki mynsiem ha ki jingjia bapher-bapher kiba la jia ha kylleng ki bynta jong ka pyrthei. Nalor kine ki jingjia, ngi la sakhi ruh ïa ki kam pynïap briew kiba shyrkhei bad kiba pynpar ‘ñiang khriat haba ïaleh ban ïalap ne khana biang. Kaba kham shyrkhei bad jyllei bha, ka dei ruh ka dei ka jingshah pynïap jong u kurim ha la ka kurim, kaba la jia ha kylleng ki bynta jong ka Ri India ne ka jingshah pynïap jong ki ‘riew lui-lui ha ki ‘riew kieng atiar.
Nalor kitei ki jingjia, ka jingduhnoh ïa ki mynsiem briew ka la wan ruh lyngba ki jingshah pynjulor ha ki bor ka mei mariang kiba la jia ha kylleng bad kiba dei ruh ki jingjia kiba ju jia hi na uwei u snem sha uwei pat. Hynrei ka jingjia ha u snem 2025, kaba kham pynsyier pynsmiej ïa ki nongleit nongwan dei ka jinghap jong ki liengsuiñ kiba la shim noh ïa ki spah tylli ki mynsiem briew. Dang shen, ngi la sakhi ïa ka jinghap jong ka liengsuiñ Air India Flight AI 171 ha Ahmedabad ha ka 12 tarik Jylliew. Ha kane ka jinghap ka liengsuiñ haduh 241 ngut ki briew ki la duh ei noh ïa la ka jingim. La sakhi ruh ba kawei ka liengsuiñ ïapom jong ka ri Bangladesh ka la hap ha kawei ka jaka pule ha Dhaka kaba la tip kum ka Milestone School and College ha kaba 19 ngut ki briew, kynthup 16 ngut ki samla pule ki la duh ei ïa la ka jingim bad palat spah ngut ki la mynsaw. Kane ka jingjia ka la jia ha nongbah Dhaka hajan Uttara ha ka 21 tarik u Naitung. Ha ka 20 tarik u Naitung ruh ka la don ka jingkylla jong kawei ka lieng ba la shong da ki nongshang kai pyrthei ha Ha Long Bay hadien ka jingwan syllad kyndit-kynsan jong ka ‘erlangthari. Ha kane ka jingjia ruh, 35 ngut ki briew ki la duh ei noh ïa la ka jingim bad tang 10 ngut ki la lait im.
Lah ban kynmaw ba ha u bnai Ïaïong, haduh 26-28 ngut ki briew ki la duh ei noh ïa la ka jong ka jingim bad bun kiwei ki la mynsaw na ka jingshah thombor ha ki lehnoh ha Baisaran Meadow hajan Pahalgam. Kum kine ki jingjia shah thombor ha ki lehnoh ki la jia ruh ha kylleng ka pyrthei kum ka jingleit tynrah jong uwei u briew uba la ñiah da ka kali Mini Cooper ïa ki paidbah kiba dang ïakhih hajan Munich Central Station ha Germany bad kiwei-kiwei.
Nalor kine ki jingjia, kiwei pat ki jingjia kiba la pynpar ‘ñiangkhriat mynta u snem ki dei ki jingjia ïap briew. Ngi la im ha ka juk kaba ki briew kim don jingtieng ne jingsngewshuh ïa ka jingkordor ki mynsiem briew. La shu pynïap beit bad i kumba ka long kaba suk haduh katta-katta. Shaei shuh kata ka jingïatip lem para briew.
Dang ha kine ki bnai, kawei na ki jingjia shah pynïap jong uwei u nongkhaïi na Indore uba la wan ‘honeymoon’ bad la ka kurim sha Sohra, ka la pynkhih win ym tang ïa ka jylla hynrei ïa ka ri hi baroh kawei. Kane ka jingjia shah pynïap jong u kurim ha la ka kurim, ka la pynmih paw ruh ïa kiba bun ki jingjia shah pynïap jong u kurim ha la ki kurim ha kylleng ki bynta jong ka Ri India. Haba phai tang hapoh jylla lajong ruh, ngi la sakhi bun tylli ki jingjia shah pynïap, kata ka kurim kaba la shah pynïap ha la u kurim, u samla uba la pynïap ïa la ka samla bad dang shen lei ha rilum Garo, la sakhi ïa ka jingshah pynïap jong kawei ka samla kaba sngew shyrkhei shi kat dei eh.
Kine ki dei tang katto-katne ki jingjia kiba la wanrah shakhmat kiba la jia ha u snem 2025. Balei haduh katne? Hato uba kumno u dei une u snem bad sa katno tylli ki jingjia yn dang sakhi haduh ban da kut une u snem? Kiba bun ki la pynpaw ba u dei u snem ba ‘jemdaw’ tam naba la shu sakhi sa tang ki kam sniew kam smeh kat shaba phai. Ynnai pat ïakren ïa ki kam tuh kam thiem lei kiba jia jan manla ka sngi. Ngi kyrmen skhem ba ki sngi bad ki bnai ban wan nangne shakhmat kin long noh kiba kham kmen bad lait na kum kine ki jingjia bad kyrmen ruh ba kiei-kiei baroh kin ïaid ha ka lynti kaba dei bad kaba biang na ka bynta baroh ki nongshong shnong.
