Shillong, Naitung 22
Ha ka sngi kaba bud, ka 22 tarik u Naitung 2025 na ka liang ki Ophisar ka Shillong Municipal Board (SMB) ki la pynlong biang ïa ka jingtalasi ïa ki Certificate Of Vending (COV) na kiba shong die madan ha shilynter ka surok ïaid kjat ha Khyndailad.
Ha kane ka jingtalasi la ïohi ba ha ka por ba ki ophisar ki dang ïaid ban talasi ki la lap ïa kawei ka dukan kaba dei trai da u bar jylla u bym shym la kohnguh ïa ka jingbthah ka Municipal hynnin ka sngi (Lah Sngi U Blei) ban khang noh shwa namar um pat don ïa ka syrnod COV, hynrei utei u bar jylla pat u la wan ban phriang ïa ki tiar da ka jingthmu ban shong die jingdie.
Kumta na ka liang ki briew ka Municipal Board mar-mar ki la rah bad tynrong ïa kitei ki tiar ban rah noh shisyndon, namar ka jingbym kohnguh, wat la ki la ai por hynnin ka sngi ban ym wan shong shuh.
Ka jingtalasi mynta la sakhi ba ka la ïaid beit ïaid ryntih khlem kino-kino ki jingïapyni bor na ka liang kiba shong die madan ha Khyndailad.
Ha kane ka jingtalasi la ïohi ruh kiba bun na kiba shong die madan ha shilynter ka surok ha Khyndailad, bun kiba la don ïa ka COV bad ki don tang katto-katne ngut ki bym pat don. Bad ki ophisar ka SMB ki la phah lum noh shisyndon ïa ki bym pat don ïa ka COV, da kaba bthah ba kim dei shuh ban wan shong kat bym pat don ïa ka COV.
Ha ka thup jong ka Shillong Municipal Board (SMB), ki don kumba 407 ngut kiba shong die madan kiba dei hok ban ïoh die jingdie ha ka thaiñ Khyndailad.
“Napdeng ki 407 ngut, ka Shillong Municipal Board (SMB) ka la pynduh noh ban ai jingbit (Permission) ïa ki 34 ngut hadien ba ki para nongshong die madan ki la pynpaw ka jingpyrshah.”
Kane ka jingpyrshah ban ai jingbit (Permission) ka dei namar napdeng ki 34 ngut, ki don ki bahaïing jong ki, kiba la ïoh ïa ka Certificate of Vending (COV).
Haba pyrshang pat ban wad jingtip kaba thikna, ka Shillong Municipal Board (SMB) ka la dep ban sam ïa ki Certificate of Vending (COV) sha 285 ngut ki nongdie madan.
Kine 285 ngut kiba la wan shim ïa ki COV kin ïoh ban shong ha artylli ki jaka ba ka Sorkar ka la pynbeit, kata ha khlieh duh ka Parking Lot MUDA bad ka Parking Lot mar pyrshah ïa ka SBI Main Branch.
