Shillong, Naitung 22
Ban kynmaw burom ïa u Bah Cherishsterfield Thangkhiew uba long uwei na ki nongseng ïa ka HNYF, ka Hynñiewtrep National Youth Front (HNYF) ryngkat ka jingïatreilang bad ka Meghalaya Arm Wrestling Association kan pynlong ïa ka rynsan ïakhun kti ba la tip kum ka ‘Cherishsterfield Thangkiew Memorial Arm Fight 2025’ ha ka 13 tarik u Nailar ha Mawlai Mawroh Community Hall.
Ki kyrdan jingkhia na ka bynta ki shynrang kin sdang naduh kiba hapoh 50 kilo, 51 haduh 55 kilo, 56 haduh 60 kilo, 60 haduh 65 kilo, 66 haduh 70 kilo bad 71 haduh 75kilo. Katba ha ka liang ki kynthei ki long kiba hapoh 45 kilo, 46 haduh 50 kilo, 51 haduh 55 kilo, 56 haduh 60 kilo, 61 haduh 65 kilo, 66 haduh 70 kilo, 71 haduh 75 kilo, 76 haduh 80 kilo bad kiba 80 kilo shaneng.
Kane ka jingïalehkai kan plie lad ïa baroh ki nongïalehkai na ki district bad ki gym bapher bapher. Ka sngi ban thew ïa ka jingkhia kan dei ha ka 12 tarik u Nailar naduh ka por 10 baje mynstep haduh 1 baje mynsngi bad ka jaka kan long ha Madan Malki.
