Shillong, Naitung 22
Ki shipai Border Security Force (BSF) ki la ïoh ban kurup ïa bun ki jaiñ ‘saree’ bad ki dawai na ki pla ba la ieh noh shadien da ki nongkhaïi tuh hadien ba ki la pyrshang ban pyni bor ïa ki shipai ap pahara ha khappud.
Katkum ka khubor ba la ïoh na ki pulit, la ong u Coy Commander, E-Coy jong ka 22nd Bn., BSF, BOP Jatrakona ha South Garo Hills u la ai ka jingujor ba ha ka 18 tarik mynta u bnai, ki BSF ki la lap ïa ka jingdon ka jingïaid lynti jong ki suba nongkhaïi tuh ha lynter jong ka khappud.
La ong hadien ba ki la ïohi ïa ki shipai BSF, ki suba nongkhaïi tuh ki la sdang ban kawang da ki maw, ha kaba na ka liang jong ki shipai BSF ruh ki la pynphai kylla da kaba kawang da uwei u bom. La ong ba kham hadien, kitei ki suba nongkhaïi tuh ki la phet noh na katei ka jaka bad na ka liang jong ki shipai BSF ki la ïoh ban kurup noh hynriew tylli ki byrni (gunny bags) na katei ka jaka, ha kaba ha ki lai tylli ki pla, kaba don bad ka kyrteng ka jaka jong ka M/s S Medicals Dalu, la lap ba don ki ‘sarees’ bad ki dawai bad ïa kine la aiti noh sha ki pulit jong ka thanad Gasuapara ha South Garo Hills.
Ha kawei pat ka khubor, u Coy Commander, D-Coy, jong ka 50th Bn., BSF ha South West Garo Hills u la ai ka jingujor ba ha ka 18 tarik mynta u bnai ha ka por kumba 10.30 mynmiet, ki shipai BSF ki la lap ïa ka jingïaid lynti jong ki runar bym lah ban ithuh ha lynter jong ki khappud bad ha kane ka por, na ka liang jong ki BSF ki la siat pynma shi kuli, kaba la pynlong ïa kine ki runar ban phet krad na katei ka jaka.
Kham hadien, ki shipai BSF ki la lap ba ka jingker sainar khappud jong ka Indo-Bangladesh hapdeng ka BFL No. 34 haduh 35, hajan jong ka BP No. 1091/3-S Gate No. 45 la dep ban pynjulor.
