Mawkyrwat, Naitung 22
Ki pulit jong ka thanat Mawkyrwat ha ka 20 tarik mynta u bnai ki la ïoh ban kem noh ïa uwei u briew uba la suba donkti ban batbor bad pynïap ïa kawei ka khynnah kaba dang 12 snem ka rta ha South West Khasi Hills District.
Une u briew uba la shah kem la tip kyrteng kum u Modu Sangma. Katkum ki tyllong khubor na u Superintendent of Police jong ka South West Khasi Hills District, Bah B Jyrwa, u la ïathuh ba ha ka 6 tarik u Risaw 2021, kawei ka khynnah kynthei (12 snem ka rta) ka la jah rngai na la ïing kaba hap ha South West Khasi Hills District ha ka por kumba 5 baje eiei janmiet bad ïa ka met jong ka la lap ha ka sngi kaba bud bad lyngba ka post mortem la pynthikna ba ka la shah batbor bad shah pynïap.
Ki tyllong khubor ba la ïoh lum, la ïathuh ruh ba u Modu Sangma uba suba donkti ha katei ka kam u la phet krad bad ym shym la lap ksai shuh ïa u. Pynban da ka jingshimkhia bad ïai buddien ïa katei ka kam, ki pulit ka Mawkyrwat ki la ïoh jingtip ba utei u briew u la phet rieh sha Byrnihat ha Ri Bhoi District bad da ka jingïarap jong ki pulit ka Byrnihat Out Post, la ïoh ban kem noh ïa utei u briew uba la phet rieh bad la wanrah ïa u sha thanat Mawkyrwat bad ka jingtohkit ka dang ïaid shakhmat mynta.
