Shillong, Naitung 22
U Myntri ka tnad pule-puthi ka Jylla, u Rakkam A. Sangma, u la pynpaw ïa ka jingkyrmen skhem ba u Myntri Rangbah ka Jylla, u Conrad K. Sangma un buddien ïa ka jingtyrwa ban pynïar ïa ka jingpynïasoh lynti rel sha Baghmara.
Katkum ka jingong jong u, kane ka jingthmu kan kyntiew ïa ki lad kamai ha ka liang ka ïoh ka kot bad kan khmih bniah ïa ka jingdonkam kaba nang kiew na bynta ka ïoh kam ïoh jam hapoh ka thaiñ.
Haba kren sha ki nongthoh khubor ha ka Lah Sngi U Blei, u Sangma u la ong, “Nga la ai ïa ka jingthoh sha u Myntri Rangbah ban kyrpad ïa u ban pynïar ïa ka jingpynïasoh lynti rel na Mendipathar sha Baghmara lyngba ka Nongalbibra lane lyngba ka Tura, Tikrikilla, Dalu bad kiwei-kiwei.”
“U Myntri Rangbah ka Jylla, Conrad K. Sangma un sa shimkhia ïa kane ka jingtyrwa bad ka Sorkar India,” u la ong da kaba bynrap ba u Myntri Rangbah u ithuh ïa ka jingdonkam jong kane ka jingthmu na bynta ka roi ka par jong ka ïoh ka kot ha ka Jylla.
Haba pynpaw ïa ka jingdonkam ha ka histori jong ki lad pynïasoh ha ka thaiñ, u la kdew ba ka khaïi-pateng shuwa ka jinglaitluid bad ka East Pakistan ka long kaba thnem bha. Hynrei ka jingphiah ïa ka ri India ka la wanrah ïa ka jingthut ha ka khaïi-pateng.
U Myntri u la ban jur halor ki jingmyntoi kiba lah ban mih na ka jingpynïasoh lynti rel sha Baghmara da kaba ong ba ka jingpynïasoh lynti rel kan ai lad ban leit sha ki ïew ki hat ha Bangladesh bad shabar, ka ban pynlah ïa ka Jylla ha ka ban pyndonkam ïa ki jingdon-jingem mariang bad ki mar ba ïadei bad ka kolshor.
U la ong ba kane ka jingthmu kan thaw ruh ïa ki lad ïoh kam ïoh jam bad kan pynkhih ïa ka roi ka par ha ka ïoh ka kot – da kaba khmih ïa ka jingdonkam kaba nang kiew na bynta ki kam ki jam hapoh ka thaiñ.
Shuh shuh ka jingpynïasoh lynti rel kan pynsuk ïa ka jingroi jong ki karkhana kum ka kam jngohkai pyrthei, ka rep ka riang, bad ka leit ka wan – ha kawei ka liang ka ban pynduna ïa ka jingshaniah ha ki kam Sorkar.
