Shillong, Naitung 22
Kawei ka longkmie kaba shong die madan ha lynti ïaid kjat ha Khyndailad ba la tip kum ka Kong Pyngrope ka la ong, ba lada ngim dei kiba duk ngin ym wan thad rong ha kane ka jaka.
Ïa kane, ka Kong Pyngrope ka la pynpaw hakhmat ki ophisar ka Shillong Municipal Board (SMB) hadien ba ki la wan ban talasi biang ïa ka COV bad namar ba katei ka longkmie kam don ïa ka COV, ki la bthah ba kan sngewbha ban lum noh shwa ïa ki tiar.
Ha kaba nyngkong ka Kong Pyngrope ka la kyrpad ïa ki ophisar ka SMB ba kin sngewbha ban shah ba kan shong die ha katei ka jaka, namar ba lada kan sangeh ban bylla mano ban bsa ïa ki khun ha ïing. Pynban na ka liang ki ophisar bad ki majistor ki la kyrpad ba kan hap ban lum beit namar lada kam lum kin sa wan lum hi da ka bor.
Haba ïakren bad ki lad pathai khubor ha ka Sngi Ba-ar ka 22 tarik u Naitung 2025, ka Kong Pyngrope ka la ïathuh ba ka la dep ban leit mih man ka por sha ka ophis ka Municipal ban kylli ïa ka COV ba ka la dep ban pynbiang lut ki kot ki sla ban ïoh ïa ka COV, hynrei na ka liang ka Municipal ka la ong, ba kan sa ïoh ha kane ka samoi ba-ar.
Ka la ïathuh ba haduh mynta kam pat ïoh ïa ka COV bad kam tip kaei ka daw ba kam ïoh, namar baroh kiba ïashong die madan lang ha kitei ki jaka ki la ïoh lut.
“Nga dei ka briew kaba la rim tam na kiba shong die madan ha Khyndailad, hynrei balei pat haduh mynta ngam pat ïoh ïa ka COV? Nga la dep ban thoh ka ‘application’ sha ka Municipal ruh,” la ong ka Kong Pyngrope.
Ka Kong Pyngrope ka la kyrpad na ki ophisar ka SMB ba kin sngewbha ban shah lem ban shong die jingdie haduh ban da ïoh ïa ka COV, namar kan shem jingeh lada kan mih na katei ka jaka, da kaba ong ba mano ban bsa ïa ki khun lada ngan shong ïing.
Hadien katto-katne por bad namar ba ki ophisar ka SMB kim shah shisyndon ba kan dang shong die jingdie ha katei ka jaka, na ka liang ka Kong Pyngrope khlem da pyni bor ka la lum noh bran-bran ïa ki tiar.
