Shillong, Naitung 22
Ka East Bengal kan ïakhun pyrshah ïa ka South United FC ha kaba sdang jong ka 134th Durand Cup ha ka Sngi Balang ha Salt Lake kaba ha Kolkata.
Ki bor pynïaid jong kane ka lympung ïalehkai kaba la rim tam ha ka dewbah Asia, ki la pynthikna ïa ka jingwan sakhi lang ka Myntri Rangbah ka West Bengal ka Mamata Banerjee.
Kane ka lympung mynta u snem kan long kaba duna ha ka jingdon ki kynhun kiba khlaiñ bor na ka Indian Super League (ISL), hadien ba ki la weng noh ïalade ban shim bynta namar ka jingbym thikna ha kaba ïadei bad ka jingsdang jong katei ka lympung ïalehkai kaba heh duh jong ka ri mynta ka samoi.
Hynrei hynriew tylli ki kynhun ïalehkai ISL ki long lai tylli na Kolkata; ka Mohun Bagan Super Giant, Mohammedan Sporting SC nalor ka East Bengal, kiba la pynthikan ban shim bynta ha kane ka lympung kaba don 24 tylli ki kynhun. Kiwei pat lai tylli ki kynhun ïalehkai ISL ki long ka lahduh mynshem snem ka NorthEast United FC, Jamshedpur FC bad ka Punjab FC, kiba la shah kynthup ha la ki jong ki group.
Kiwei pat ki kynhun ki dei kiba ïashim bynta ha ka I-league bad I-League 2 nalor ki kynhun shipai bad ki kynhun shipai (paramilitary forces). Ka Tribhuvan Army FC jong ka Nepal bad ka kynhun ba la pynïasoh lang jong ki shipai Malaysia ki dei ar tylli ki kynhun nabar ri kiba pyndep ïa ka kyrdan ïalehkai, ha kaba 24 tylli ki kynhun kin shah phiah sha hynriew tylli ki group.
Ïa kane ka lympung yn pynïalehkai ha ki san tylli nongbah; ka Kolkata (ar group), Jamshedpur, Shillong, Kokrajhar bad ka Imphal.
Ïa ka Group-E yn pynlong ha ka nongbah Shillong ha kaba kin don saw tylli ki kynhun kiba kynthup ïa ka Shillong Lajong FC, Rangdajied United, NorthEast United FC bad Malaysian Arm Forces.
Te, kumta ka Shillong Lajong kan sdang ïa ka jingïalehkai ba nyngkong pyrshah ïa ka Malaysian Arm Forces ha ka Sngi Saitjaiñ ha ka por 4 baje nohphai sngi ha Jawaharlal Nehru Stadium, Polo.
