Shillong, Naitung 22
Ka dei ka khana jong ka jingangnud bad ka jingjop, haba u Myntri Rangbah ka Jylla, u Conrad K Sangma, u la leit hi dalade sha Japan ban ïakynduh ïa ka kynhun kyrpang jong ki Nos na kane ka jylla kiba la sdang ïa ka jingïaid lynti kaba pynkylla ïa ka jingim.
Kine ki Nos, kiba don mynta ha Kobe, Japan, ki long ka jingpynshisha ïa ka bor pynkylla jong ka lad bad ka jingkut jingmut, ba la pynkhih da ki jingthmu ba jngai jong ka Sorkar Meghalaya.
Kane ka jingleit jong ki Nos napoh kane ka Jylla shabar ka Ri ka la sdang ha u bnai Jymmang 2023,ha kaba ka Sorkar ka la pynlong ïa ka jingïalang treikam kaba thymmai ha Shillong, kaba thmu ban pynïasoh ïa ki Nos ba tbit jong ka Meghalaya bad ki lad ki lynti ha ka pyrthei bad ki la don palat 1,300 ngut ki Nos kiba la wan da ka jingthrang ban pyni ïa la ka sap.
Lyngba ki jingïatreilang kiba thmu bad ki kompeni HR jong ka pyrthei, kane ka jingthmu ka la seisoh ha kaba haduh 27 ngut ki Nos ki la ïoh ïa ki kam ba pawnam ha Japan, bad sa 18 ngut ki la ïoh ïa ki lad ban wad ha Singapore.
Ha ka jingleit jngoh sha Kobe, u Myntri Rangbah ha ryngkat ki Ophisar na ka Tnad Koit ka Khiah, u la ïakynduh ïa ki Nos ban pynthikna ïa ka jinglong jingman jong ki. Kane ka kynhun kaba dei ka kynhun kaba ar jong ki Nos ba la don ha Japan, ka la pynpaw ïa ka jingsngew sarong bad jingsngewnguh.
Napdeng jong ki la don ruh ka Kong Laikyrmen Khardewsaw kaba dei ka Nos ha Kobe Kaisei Hospital bad kaba dei napoh ka shnong Umtrewsaw kaba don ha Ri Bhoi District. Kane ka nos ka la pynpaw ïa ka jingïaid lynti jong ka, kaba la ïathuh, “Ka lynti na shnong jong nga sha Japan ka la dap da ki jingeh, hynrei da ka jingkyrshan jong U Blei, ki bahaïing bahasem jong nga, bad ki paralok, ka la kylla long ka jingïaid lynti kaba itynnad. Nga im ïa ka jingangnud jong nga ha Kobe.”
Kawei pat ka Nos, ka Kong Jenisha Lyngdoh, kaba don ruh ha Kobe Kaisei Hospital, ka la pynpaw ïa ka jingsngewnguh kaba khraw da kaba ong, “Nga ai khublei ïa u Myntri Rangbah ka Jylla bad ïa ka kynhun jong ka MSSDS na ka bynta kane ka kabu kaba khraw. Ka jingwan trei ha Japan ka la long ka jingangnud jong kiba bun na ngi, bad lyngba ka jingkyrshan jong ki, ngi la ïoh ïa ki jingshemphang kiba kordor bha ki ban pynwan dur ïa ka lawei jong ngi.”
U Myntri Rangbah, da ka jingsngewktah lyngba ka jingïathuhkhana jong ki Nos, u la pynpaw ïa ka jingsngewkmen kaba khraw ïa ka jingjop jong ka prokram. “Ngi sngewkmen ban ïohi ïa ka jinglong ba shngaiñ bad ba kyrshan ha ka Kobe Kaisei Hospital. Ki Nos jong ngi kim dei tang kiba pynkylla dur hynrei ki dang long kiba roi. Kane ka dei ka kabu ksiar na ka bynta baroh kiba angnud ban rah ïa ka sap jong ki sha ka pyrthei,” u la ong.
Kane ka jingthmu ka long kham palat ban ïa ka prokram ai kam; ka dei ka jingshai jong ka jingkyrmen, kaba pyni kumno ka jingthmu, ka jingiatreilang, bad ka jinglah ban shah ki lah ban pynkylla dur ïa ki jingim.
Naduh ki shnong jong ka Meghalaya haduh ki hospital jong ka Japan, da ka jingïalam ba don jingthmu jong u Myntri Rangbah, u Conrad K Sangma bad ka jingkut jingmut jong ki Nos, ha kane ka sngi, ki thoh ïa ka khana jong ka jingjop kaba phylla, kaba ai mynsiem ïa kiwei pat kiba bun ba kin don ka jingthrang kaba khlem kut noh.
