D H Kharkongor
Katba nang ïaid ki sngi ki snem la shu sakhi satang ïa ki khubor jong ka jingbymhok. Ki khubor kiba pynshisha ba la nang man roi ki kam bymhok, ha ryngkat ka jingthala. Ki khubor kiba la kumba u briew um tieng burom shuh wat ïa u Blei. ïa u para briew lei te um suitñiew shuh hi ruh. Ki khubor kiba pynshisha ba u briew um tieng ban kheiñ dewthala wat ïa ki Aiñ ki jong u Blei. Kaba katno tam ynda haba ki briew kiba kam ba ki tip ïa u Blei ki pynkheiñ pat de, ha kaba rieh, ïa ki aiñ ki jong u Blei. Tangba nga ïalade shimet te ngam kyndit shuh lymne sngewphylla shuh. Katta katba phi ruh phi nang ïaid ka kyrta ka jong phi ba phi ruh, kumba long ma nga, phin nym kyndit shuh lymne sngewphylla shuh. ñiuma ki khmat ki la nang byrie, katta katba nang ïaid ka kyrta ne katta katba nangjan sha ka jinglong tymmen, hynrei kita ki juh ki khmat ki don pat de ïa ka bor kaba phylla naba ki lah pat de ban ïohi synna ïa kiei-kiei baroh ba la buhrieh bha khop ha lyndet jong ka durbula ne ka ‘mask’.
Sngewsih ban ong ba kiba bun hi te kim long kumba ki pynpaw ïalade sha ka pyrthei. Ki buhrieh bha khop ïa la ka jong ka jinglong kaba shisha ha lyndet jong ka dur ‘bula’. Ka dei ka jingshisha, kaba ngi dei ban pdiang khlem da sngewphylla. Yn ïa sngewphylla pat de lei wei ba u briew u dei hi tang u briew bad ba un dang ïai dei hi ruh tang u briew. Te kumta ym don uwei ruh uba janai. U briew un ïai dei hi tang u briew ba kumta un ïai ïaleh ban buhrieh ïa la ka jong ka jinglong kaba shisha. U dei u briew ba kumta un nym lah lait hi ruh na ka jinghap noh ne na ka jingkyllonnoh, da kumne ne da kumtai. Un kum liat hi lor wei ba um lait na ki jingpynshoi ki pynshad jong kane ka pyrthei. Ka pyrthei jong ka jingïatynneng lem bad ka jingïabeh thala ïa ka rongphong. Ka pyrthei rhah bor, rhah spah bad rhah ïoh burom.
Lada husiar katba husiar ne lada tbit katba tbit pynban kan don ka khyllipmat ba mano-re-mano kin kum ïohi shynna ïa ka dur kaba shisha. Ka dur kaba shisha kaba la buhrieh, baroh shikatta, ha lyndet jong ka dur ‘bula’. Lada husiar katba husiar ruh pynban yn don mano-re-mano ba kum lap lane kum tip ïa ka jingshisha. Hynrei ym baroh uba lap uba tip ïa ka jingshisha u ban leit ïalap ïariew ïa kata katei katei, shane bad shatai. Kam don jingmut hi ruh ban ïalap ïariew wei ba ka pyrthei ka lah dep ban shah pynthame ha ka dur ‘bula’. Ka pyrthei kan nym pdiang bad kan nym ngeit hi ruh ïa kata kaei-kaei. Kumta kam don jingmut lait na kaba shu rymmuiñ wei briew. ñiuma, kam long kaba eh ban shukor lane kaba eh ban pynthame ïa u para briew, tangba ïa u Blei te em.
Te kumta nga ngeit ba ngi baroh ngi ju kum shah shukor noh. Kum ka nuksa ba kiba ha kaba mynnyngkong ngi nang pyrkhat ba ki dei ki ‘ksuid’ phewse ynda ngi la ïa ithuh-ithaw bha lane ynda haba ngi la ïadei kam ïadei jam ba ngi sa shem pynban ba ki dei ki ‘Angel’. Katba kiba ha kaba nyngkong ngi nang pyrkhat ba ki dei shisha ki ‘Angel’ phewse dei tad ynda ngi la ïa ithuh khambha ne ngi la ïadei kam dei jam ba ngi sa shem pynban ba ki dei ki ‘Ksuid’. Ka rhah bor, ka rhah spah bad ka rhah burom ka pynbor wat ïa ki ‘Ksuid’ ba kin kup ïalade da ka dur ki ‘Angel’. Ka lah eh shisha ban pynïapher hapdeng ki ‘Ksuid’ bad ki ‘Angel’. Ka eh wei ba ka jingïasyriem kaba kumba ïasyriem ka ‘Mluh’ bad ka ‘Shini’. Lymda phikir te yn kum ngat pynban plak da ka ‘Mluh’ ha ka jaka jong ka ‘Shini’. Phin sa sngewthuh pat de ruh ïa kata ka jingbakla ka jong phi tad ynda phi la mad. Ynda la mad ba kthang pynban ngang.
Ka jingbymhok lem bad ka jingthala kaba kat shaba phai bad ruh ha la ki rong ki rup. La imat kumba la ksan ka ‘jingbymhok’ lem bad ka ‘jingthala’ bad la rem noh ka ‘hok’, ka ‘jingshida’ lem bad ka ‘jingshisha’. Ka imat kumba ym don jingmut shuh ban kren pyrshah ïa ka jingbymhok bad ïa ka jingthala. Ka paw kumba lada kren ruh ym don shuh ban dang treh ban shah shlor. Nangne sha khmat lei te ym long shuh hi ruh ban kren pyrshah ïa ka jingbymhok bad ïa ka jingthala. Yn hap ban shu ïa long noh thik kum uta u ‘Dkhoh Tymmen’. U Dhoh Tymmen uba shemphang, uba shong-beit khop bad jar halor jong u tnat, uba halor tam eh, jong u ding Sning. Uba shong ruh tang marwei hi. Uba kiwei kim tip ba u don hangta. Kumta katta katba u nangshon beit khop bad katta katba u nangsngap ruh jar jar ba katta u nang ïohi shynna bad katta u nangiohsngew kyndiang ïa kiei-kiei baroh. Katta katba u nang ïohi shynna bad katta katba u nang ïoh sngewkyndiang ba katta ruh u nangroi ka jingtip bad ka jingshemphang, halor kiei-kiei baroh kiba u ïohi bad u ïohsngew. La katta um sngewkyndit lymne sngewphylla ïa kiei-kiei kiba u ïohi shynna bad u ïohsngew kyndiang. Um leit ïalap ïariew hi ruh, la shane lane shatai, ïa kita kiei-kiei kiba u ïohi shynna da la ki jong ki khmat bad kiba u ïohsngew kyndiang ruh de da la ki jong ki shkor. Um lah pat khlem rymmuiñ. Kumta ngam sngewphylla ba balei ba kiba kham bun napdeng ki riewkhraw ‘jingtip’ bad ki riewkhraw ‘jingshemphang’, kiba ‘beit’ ruh de ka jinglong, kim banse ban ïa long lem noh kum u ‘Dkhoh Tymmen’. Thik kum u ‘Dkhoh Tymmen’ la ha ka kam kur, ka kam niam, ka kam shnong bad ka kam saiñ hima-sima.
