Shillong, Naitung 22
U MLA ka 17-North Shillong Konstitwensi, Bah Adelbert Nongrum ha ka Sngi Ba-ar, ka 22 tarik u Naitung 2025 u la pynpaw ïa ka jingshaniah ba ka Sorkar MDA-2.0 ba la lamkhmat da ka National People’s Party (NPP) kan lah ban pyndep ïa ka jingkular ban pynkynriah noh ïa ki nongshong shnong na Them Metor shwa ba kan kut ka samoi treikam jong ka.
Haba kren sha ki lad pathai khubor, u Bah Adelbert Nongrum u la ong ba lada ka sorkar ka lah ban pynurlong ïa kane ka kam kan long ka jingjop na ka bynta u paidbah, namar ba kane ka mat ka la sahteng bha da ki bun-bun snem.
“Kumba kane ka sorkar ba la ïalam da ka NPP ka la kular ba kan pynkynriah noh ïa ki briew na Them Metor, hooid ngi la shu shah kular bad khmih lynti na kawei ka por sha kawei pat, na kawei ka ilekshon sha kawei ka ilekshon, hynrei ngi da kyrmen ba ka jingthmu ban pynkynriah noh ïa ki nongshong shnong na Them Metor kan treikam,” ong u Bah Adelbert.
U la ong ruh ba kum u MLA ngan ym shongthait lada ka dei ha kano-kano ka bynta ruh, namar kane kam dei tang ka jingmyntoi ïa ki nongshong shnong ba marjan-marpa hynrei ka dei ïa baroh. Kane ka dei ka mat kaba la sahteng la slem bah bad kam dei tang ka mat jingdawa jong ka konstitwensi, hynrei ka dei ka mat jingdawa jong ka jylla.
U la ong ruh ba “Lada phin peit ha ka jinglong jingman ha kane ka jaka, nga ym sngewlehraiñ ban ong, ba katei ka jaka ka long kum ka slum bad ka Sorkar Jylla ka dei ban shimkhia halor kane ka mat ban ym pynslem shuh ban pynkynriah noh ïa ki briew ba shong ha Them Metor.”
U Bah Adelbert Nongrum u la ong ruh, ba la donkam ban weng noh ïa ka khyrdop ap pulit ha them Ïew Mawlong khnang ba kan ym pynthut ïa ka ïaid ka ïeng u paidbah bad ban tehlakam na ka jingdheng kali.
