Nongstoiñ, Naitung 22
U Superintendent of Police (SP) jong ka West Khasi Hills District, u Bikram D Marak, u pyntip paidbah ba hadien ka jingpynlong ïa ka Screening Test ha ka 15 tarik u Naitung, 2025 na ka bynta ka jingthep kam kum u Driver (Contractual Basis) hapoh ka Directorate of Forensic Sciences, Meghalaya, Shillong, la lah ban pynmih ïa ki kyrteng jong ki nongaplai kiba la pass ïa ka test bad ïakhun pat sa ïa ka personal interview.
Ha ka kyrwoh khubor ba la phah, u SP ka West Khasi Hills u la ong ba ka test ka dei kaba la pynlong da ka rukom treikam kaba shai (katkum ka Notification No. E/III-6/3-2025/1830, ba la pynmih ha ka 27.06.2025), ha kaba ki nongaplai ki la shah test ha ka sap ñiah kali, ka bor met, ka jingtip halor ka jingma bad ka jingtip shaphang ki bynta ba kongsan jong ka kali.
U la ong ruh ba ki kyrtong kiba la shah jied kin hap ban wan sha ka Interview ha ka 28 tarik u Naitung, 2025 ha ka por 10:30 mynstep ha ophis u Superintendent of Police, West Khasi Hills District, Nongstoiñ.
Nangta, ka khubor na u SP ka la ong ruh ba kine kiba la shah jied ki kynthup ïa u Lambha Thongni na Pyndengrei, Nongstoiñ, u Samteikordor Lyngdoh Lyngkhoi na Tiehsaw, u Boneyjune Marwein na Pyndengrei, u Bonnyboy Wanniang na Tiehsaw, u Gilberth John Mawlieh na Marskuin, u Banshemkupar Syiemlieh na Mawkhar Mawshynrut, u Shanbhah Mawrie na Mawthylliang Riangdo, u Standingwell Nongbak na Nongdaju, u Altimios Kharsyntiew na Upper New Nongstoiñ bad u Sabel Mawlong na Nong Mawlong.
U Bikram D Marak u la kyntu ïa baroh kiba la shah jied ba kin poi biang por bad pynkhreh lut ïa ki kot ki sla donkam na ka bynta ka personal interview.
