Shillong, Naitung 22
Ka long shisha ka burom kaba khraw ïa ka Meghalaya Police, hadien ba ar ngut ki dkhot jong ka, ki la lah ban wanphai sha la ïing hadien ba ki la ïoh ban khur lai tylli ki takma ksiar ha ka jingleit ïashim bynta sha ka rynsan ïakhun kti ba la tip kum ka World Police Games, kaba la long ha Bermingham, Alabama USA.
Ïa kane ka jingïakob la pynlong naduh ka 27 tarik u Jylliew hadien ka 5 tarik u Naitung mynta ka snem.
Kine ar ngut nongïakhun kti jong ka MLP ki long u Bah Allan Sun Marbaniang, uba la khur ïa ka takma ksiar na ka kyrdan ïakhun jong ka kti kamon, bud pat sa Kong Wandalin Syiemïong, kaba la kiew rynsan ban ïakhun ha ka kyrdan 65 kg senior women, kaba hangne ka la lah syndon ban khur ar tylli ki takma ksiar kaba wan na ka jingïakhun jong ka kti kamon bad kadiang.
Ha kane ka kynti u Bah Allan bad Kong Wandalin, ki la ïoh ban mihkhmat sha kane ka rynsan ïakhun na ka thup jong ka Indian Police kiba don baroh kumba 240 ban kiew rynsan ïakhun ha la ki jong ki jong ki kyrdan jingkhia.
Ha katei ka lympung la wan ïashim bynta da ki nongïakhun kti na 71 tylli ki ri.
