Shillong, Naitung 22
U sohtrun uba la mih na ka Jylla ha kine ki khyndiat taïew ba la dep u la poi sha Dubai bad mynta u la don ha ka LULU Hypermar-ket, kaba don hapoh ka Silicon Central Mall ha katei ka nongbah.
Kum ban shu kdew hangne, ka Myntri tnad pla tyngka ka Sorkar Pdeng, ka Nirmala Sitharaman, ha ka 11 tarik Naitung, 2025, ka la kaweh lama kum ka dak jong ka jingpyllait ïa ka song ba 2 metrik ton u sohtrun ba khlem ai dawai (Premium Organic) napoh ka Jylla sha ka LULU Retail, Dubai.
Ïa kane ka jingïalang kaweh lama la pynlong ha Shillong, ha ka jingïadonlang u Myntri Rangbah ka Jylla, u Conrad K. Sangma, Myntri ka tnat rep ka riang, Dr. Mazel Ampareen Lyngdoh, bad kiwei-kiwei.
“Kane ka jingïalang ka pyni nuksa ïa ka jingnang kiew jong ka Jylla ha ka pyrthei haba phai sha ka jingpynïaid ïew ïa ki soh ki pai, ki jhur ki jhep, ki syntiew bad ka pyni ïa ki jingpyrshang kiba dang ïaid shakhmat jong ka Sorkar Jylla ban pynbha ïa ki lad pynïasoh bad ki ïew ki hat jong ka pyrthei na bynta ki mar rep ba kyrpang jong ka,” ong ka kyrwoh na u Commissioner & Secretary ka tnad ka rep ka riang ka Jylla.
U la ong ba kane ka jingjop ka ïahap bad ka jingthmu ba radbah jong u Myntri Rangbah ka Jylla, u Conrad Sangma, uba la buh thong ban pynkiew palat ar shah ïa ka jingïoh jong ki nongrep ha ka Jylla ha ki snem ban wan.
“Ha ryngkat ka jinglong pdeng jong kane ka jingthmu jong u (Myntri Rangbah), ka long ban thaw ïa ki lad pynïasoh kiba khlaiñ ha ka liang ki ïew ki hat, khnang ban pynlah ïa ki mar-rep ba kyrpang ka Jylla ban poi sha ki ïew ba pawnam hapoh ka ri bad shabar ri kumjuh,” u la ong.
Nalor kane, u la ong ba ka Jylla ka kular skhem ban pynroi ïa ki jaka pynmih mar-rep kiba heh bad ban bei tyngka ha ki lad jingïarap ki ban pynmih ïa ki mar ym tang kiba paka hynrei ban pynmih bun ïa ki.
“Ka nongrim jong kane ka jingkylla ka dei ka ‘CM Farm+’ ha kaba ki nongrep ki ïohpdiang ïa ka jingkyrshan kaba pura na bynta ka jingrep jingthung kiba rem dor, ka jingai jinghikai ha ki rukom rep kiba paka tam, bad ka jingïasam jingtip ban pynbha ïa ka jingpynmih,” ong ka kyrwoh.
Shuh shuh da kaba pynïasoh lang ïa kine ki buit treikam, ka Sorkar ka kyntiew ïa ka jingmih ha ki lyngkha, pynduna ïa ka jingduhnong hadien ba la dep ot, bad ha kaba khatduh ban kyntiew ïa ka jingïoh bad ka lad kamai na bynta ki nongkyndong ha kylleng ka Jylla.
Katei ka song sohtrun ba la dep phah, kaba la wan na ki nongrep jong ka Jirang Organics Farmer Producer Company ha Ri-Bhoi, ka pyni nuksa ïa ka jingkylla ha ka rep ka riang jong ka Jylla kaba la kyrshan da ka IFADbacked Megha-LAMP (Meghalaya Livelihoods and Access to Markets Project).
Kum ban shu kdew hangne, ka Jylla ka la lah ban shalan palat 20 metrik ton u ‘GI-tagged Khasi Mandarin’ sha ki ïew ki hat jong ka Middle East, 10 metrik ton u sohtrun sha Dubai bad 15 metrik ton u sying ba khlem ai dawai uba la pynkit lyngba ki lynti duriaw ha u Lber, 2025
“Katei ka song sohtrun ka la poi sha Dubai bad mynta kitei ki sohtrun ki la don ha ka LULU Hypermarket, kaba don hapoh ka Silicon Central Mall – kaba pyni sa kawei pat ka jingjop ha ka jingïaid lynti ka Jylla ha ka khaïi pateng ha ka pyrthei,” pynkut ka kyrwoh.
