Shillong, Naitung 22
U nongshna phlim jong ka Jylla, Bah Pradip Kurbah u la shah jied na ka bynta ka ïew projek ba pawnam jong ka Asia kaba la tip kum ka Asian Project Market, Busan 2025.
Ka phlim thymmai jong u kaba la ai kyrteng ‘MOON’, ka la shah jied na ka bynta ka Asian Project Market (APM) kaba don ka jingïakhun kaba jur bha ha ka tamasa phlim ka ban long ha Busan International Film Festival mynta u snem.
Na ka rekod kaba 455 tylli ki jingthep na ki 44 tylli ki ri, tang 30 tylli ki projek ki la ïoh ïa ka jaka, ha kaba ka phlim ‘MOON’ ka la long kawei na ki phlim na ka dewbah Asia ban ïoh ïa kane ka project.
Ha ka jingïatreilang hapdeng ka Hello Meghalaya, ka Shiven Arts, bad ka Kurbah Films, dang shen kane ka phlim MOON ka la ïoh ïa ka jingmynjur ba pura na ka Hello Meghalaya.
Ha kane ka phlim ba thymmai, ki tyngshop bad ki puron kin long ki nongak kiba pawnam kiba kynthup ïa u Albert Mawire, u Merlvin Mukhim, u Anvil Laloo, u Jeetesh Sharma, bad ka Baia Marbaniang bad sa ïa kiwei kiwei ki tyngshop yn sa shim shuh shuh lyngba ka audition ka ban sa long shen.
Ïa ka jingring dur ïa kane ka phlim la buh ban sdang mynta ka aïom tlang kaba shim ïa ka jingjylliew jong ka suiñbneng kaba kongsan bha ha ka jingïathuhkhana.
Lah ban kdew ruh ba ïa ka screenplay bad ka khana la thoh lang da u Bah Pradip Kurbah bad ka Paulami Dutta.
Lah ban kdew ruh ba ka Busan International Film Festival la pynlong manla u snem ryngkat bad ka tamasa phlim jong ka pyrthei ha Busan, ka Iew Projek jong ka Asia ka dei ka jaka pynmih phlim bad ai pisa kaba heh tam bad kaba donbor tam ha Asia. Kane ka shlem ka ai ka jaka ruh kaba kongsan bha na ka bynta ki nongshna phlim kiba dang mih ban ïatreilang bad ki nongpynmih phlim, ki nongbei tyngka, bad ki nongsam phlim nabar ri, da kaba pynroi ïa ki jingïatreilang kiba pynlah ïa ki jingpynmih phlim lang bad ban pynïar ïa ka jingpoi sha ka pyrthei.
Lah ban kdew ruh ba ka APM ka pawnam bha ruh na ka bynta ban kyrshan ïa ki sur bapher bapher jong ka thaiñ bad ban pynpaw ïa ki mat ba kyongsan ha ka imlang sahlang kum ka jingbym ïaryngkat, ka jinglong shynrang bad kynthei, bad ka jingkylla ha ka ïing ka sem.
Kane kam dei ka jingïoh kaba nyngkong eh jong u Bah Pradip Kurbah ha APM; Ka phlim jong u kaba la ïoh jingïaroh bha ka dei ‘Ha Lyngkha Bneng’ bad ka la shah jied ruh na ka bynta ka ïew projek jong ka Asia ha u snem 2020.
Haba phai khyndiat shaphang kane ka phlim thymmai jong u Bah Pradip Kurbah, u nongïoh ïa ka khusnam ba pawnam jong ka Kim Jiseok Award ha Busan ha u snem 2019 bad uba jop dang shen ïa ka nam Best Director ha Moscow International Film Festival 2025, u Bah Pradip u la pynpaw ba kane phlim thymmai ka jong u ka dei shaphang ban ïakhun pyrshah ïa ka jingdum ba shapoh kaba ngi baroh ngi kit lyngba ka jingkyrmen bad ka jingïaishah.
Shuh shuh u Bah Pradip u la pynpaw ïa ka jingsngewnguh kaba khraw ïa ka Hello Meghalaya ka OTT platform jong ka Sorkar Meghalaya bad u nongpynmih phlim u Shankar Lall Goenka uba long ruh u Producer jong ka phlim Ïewduh halor ka jingkyrshan jong ki.
U Bah Pradip u la shim ruh ïa ka lad ban pyni ba kane ka phlim ‘Moon’ ha APM Busan kum ka rynsan kaba kongsan ban khring ïa ki nongpynmih bad ki nongbei tyngka ba kham bun, kaba long ka sienjam kaba donkam haba kheiñ ïa ka jingheh bad jingmang pisa jong ka phlim.
Lah ban kdew ruh ba kane ka 2025 Asian Project Market kan long naduh ka 20 haduh ka 23 tarik u Nailur ha BEXCO, Busan, ha kaba yn pyni ïa ki projek ba la jied na 15 tylli ki ri bad ban rakhe ïa ka jingpher ba itynnad jong ki phlim Asia ba mynta.
Shuh shuh na ka bynta ka imlang-sahlang jong ki nongshna phlim jong ka Shillong bad Meghalaya, ka jingshah jied jong u Bah Pradip ka pyni ïa u mawjam uba kongsan bad ka nuksa kaba shai bha kumno ki khanatang jong ka thaiñ ki lah ban sawa ha ka pyrthei.
